昨日港股表現，恐怕令唔少好友失望，尤其滬綜指都升逾2%收市，港股居然不為所動，早市高開僅10點後很快轉升為跌，收市跌57點，收報21,579點。

恒指期貨走勢2014/2/19

始作俑者，又係幾隻基金提款機內銀股唔生性所累，中國銀行（03988）、工商銀行（01398）及建設銀行（00939）跌幅介乎1.2至1.5%，三隻股票拖低恒指44點。即月期指日市收報21,514點，低水65點，成交4.58萬張。

目下所見，好友唯一依據，是昨日午後淡友較積極擴大即市波幅，將期指推向即市低位21,466點，當時無論恒指及期指，都未跌穿上周五低位21,480及21,371點，亦意味着今次自21,197點開展的反彈，未判死刑。

查實，昨日整體大市升跌股份比例是1.23對1，氣氛唔算差。另一點使筆者相信中期反彈未完的，是沽空佔大市成交比例未肯回落，尋日更高見12.45%，是今輪新興市場撤資潮的新高，亦連續第九個交易日高於一成，回顧去年港股八、九月都曾經出現這種情況，之後大市由21,465點抽到上23,554點，挾空倉幫到唔少忙。

除非現貨及期指跌穿21,480及21,371點，否則短期目標，仲係博恒指向着22,222點的終極考驗推進。