連續兩個月咁差的非農數據，基本上可確認上半年聯儲局只會維持減少買債規模，但應該未足以令聯儲局要減慢收水。不過，唔製造主題大戶又點搵錢？

澳元兑美元走勢

今個星期二同星期四，耶倫將分別喺眾議院金融服務委員會同埋參議院銀行委員會上發言，市場就想知道數據有無影響聯儲局部署，如果覺得耶倫的言論都未夠，今個月二十日聯儲局將公布最新議息會議紀錄，未來兩星期的焦點相信離唔開聯儲局會否減慢收水步伐，美元將有一定壓力。

如果係咁，今年上半年有機會跑贏美元的英鎊同紐元，策略都應該係搵位買入為主。英國星期三會公布季度通脹報告，市場關注央行會唔會將前瞻指引推一推龍門，央行行長卡尼同日亦會發言，技術上就見阻力於1.645至1.647，預期爆上機會唔大，繼續睇1.625至1.645間整固。

至於紐元由0.805水平抽上近0.83，技術支持在0.818，建議有機會調整至0.82樓下可以吸納，止蝕於0.814。

順帶一提，澳洲儲備銀行（RBA）聲明令澳元淡倉減少，而RBA上周五的季度貨幣政策聲明中表示，年中澳洲通脹或會突破3%，至3.25%，減息的可能性降低，有利澳元挾高，本周支持區將在0.8830至0.8870，短線可在0.89樓下買入，止蝕於0.8810，目標睇0.9050至0.9080。