近排新盤個個減價推出，又送唔同優惠，二手樓價當然「有壓力」，尤其是面積較大嘅三房單位。藍田麗港城有個高層海景三房單位，再變番九七蟹貨，減價賣838萬元，比九七帳面仲蝕11萬元。另東涌映灣園三房單位，依家樓價唔使500萬元有交易。

近期新盤爭相減價推出，以致二手樓價受壓。（資料圖片）

私樓三房單位跌價個案

世紀21康聯蔡惠娟話，麗港城22座高層海景單位，建築/實用面積約939/748方呎，本來業主「底價」都要880萬元，但終於減到838萬元沽貨，建築/實用呎價約8,924/11,203元，比九七年買入價，帳面蝕約11萬元。另同座有相連單位，賣1,230萬元，實用呎價1.02萬元。

東涌物業曾家輝報料，東涌過去三日連錄五宗買賣，全部都係三房單位。映灣園有個11座高層連約單位，係屬建築/實用面積約884/652方呎嘅三房間隔，舊年十月叫價518萬元放盤，早排減到500萬元，最後再減多10萬元，畀收租客490萬元買咗，建築/實用呎價約5,543/7,515元，創三房價近排低位。

南豐新邨兩日開3單

樓價跌咗，交投自然多番。中原楊文傑同劉Sir講，鰂魚涌南豐新邨兩日有三宗買賣，有兩宗係三房。有個7座極低層單位，實用面積516方呎，成交價513萬元，實用呎價9,942元，唔使1萬元，係近兩年低位。另一個8座高層三房單位，同一個呎數，都要賣631.6萬元。

利嘉閣鮑允中話，九龍灣德福花園今個月都有五宗買賣，有個C座低層16室，兩口價加埋減57萬賣473萬元，實用呎價都只係約8,507元。中原歐陽振邦講，長沙灣西九四小龍三日有八宗買賣，昇悅居有個2座高層F室賣550萬元。

SSD成交上月70宗

另稅局發言人話，上個月印花稅署已確定了七十宗須繳付SSD交易，按月少約21宗，涉及稅款跌70萬至1,650萬元。

不過，當中揸貨超過半年、但係响一年內（即須付樓價10%SSD）轉售嘅辣招盤，就未錄得成交個案。