為進一步緩解內地流動性短缺,人行昨日再推1,500億人民幣逆回購操作,惟對大市刺激有限,恒指全日在窄幅水平徘徊,波幅只有129點,收市報21,960點,跌15點,惟交投暢旺,全日主板成交有729億元。

市場對放寬一孩政策反應冷淡,相關乳業股未見有突出表現。(資料圖片)

睇返恒指9RSI已跌至23的超賣水平,似乎大市只係等待一個好消息作出反彈,估計假期前恒指會繼續喺22,000點水平整固,等農曆年假期後開紅盤,所以現階段不建議再做淡。

聯想見12元無難度

雖然尋日恒指仍然下跌,但唔少股份已經收復失地,睇番尋日主板上升股票有697隻,下跌444隻,證明氣氛唔係太差,只不過係投資者炒股唔炒市。藍籌股以聯想(00992)表現最突出,股價重上10元以上,以10.48元收市,升5.85%。集團宣布收購IBM伺服器業務,市場對今次交易睇法相當正面,大行相繼調高公司目標價,普遍都睇12元以上,睇佢尋日走勢,要升上12元相信只係遲早問題。

除聯想之外,尋日唔少科網股都有反彈,金山軟件(03888)、神州數字(08255)都升逾5%,博雅(00434)及網龍(00777)亦升超過3%,由於科網股是今年炒作主題,估計相關股份仍會反覆做好,建議可採取逢低吸納策略。另外,內地彩票股御泰中彩(00555)及華彩控股(01371)分別升1.7%及8.8%,不妨跟勢炒返轉。

中國節能海東青(02228)昨日逆市升逾一成,集團除具環保概念之外,更獲大型央企中國節能環保集團入股。早前同樣獲中國節能環保入股的百宏實業(02299),自月中復牌後股價一直在4.35元水平徘徊,睇走勢隨時開車,需密切留意映期。

內地放寬一孩政策,惟市場對呢個消息顯得相當冷靜。去年上市的兩隻乳業股,輝山乳業(06863)及原生態牧業(01431),表現持續不濟,原生態日前更創1.79元上市新低,惟昨日瑞信發報告予公司「跑贏大市」評級,目標價訂在2.8元,故刺激股價由低位回升,逆市升6%,以1.91元收市。由於原生態累積跌幅已多,故瑞信的報告即時有點石成金的作用,但由於整體板塊仍未成氣候,亦非市場焦點所在,相信升勢難以持久,博短線反彈的投資者只宜小注。