次批白居二熱情不再，居屋第二市場樓價跌得快過私樓，有部分居屋更已「跌凸」，成交價重返措施前水平。好似將軍澳裕明苑有個低層三房單位，綠表價唔駛300萬元，實用呎價4,785元，係舊年至今屋苑呎價最低。另屯門富健花園高層戶，200萬有找，都重返去白居二推出前價位。

受累次批白居二熱情冷卻，居屋第二市場樓價回落。（資料圖片）

居二市場近期低價成交

中原伍錦基同劉Sir講，上述呢個裕明苑A座低層11室，建築/實用面積約830/606方呎，係三房單位，屋苑近住厚德商場，業主唔喺香港，起初叫價340萬元，終於減到綠表價290萬元賣出，低市價10%，建築/實用呎價約3,494/4,785元，係去年至今屋苑最低呎價。

該行又話，同區富寧花園3座中層C室，有白居二做七成按揭，用250萬元買咗，實用呎價約4,223元。

另外，屯門富健花園上禮拜連錄5至6宗居二買賣，祥益黃慶德講，富健花園高層單位，200萬元有找，都返番去白居二推出前嘅價位，有個6座高層C室單位，實用面積592方呎，業主減價白居二即買，成交價198萬元，低市價10%，實用呎價約3,345元。

白居二連環攻夾屋

同行胡志偉話，另外有班高要求嘅白居二客，轉買有會所嘅屯門夾屋，景新臺連錄2宗白居二入市成交，有1座高層F室套三房單位，賣成310萬元。

世紀21奇豐周淑萍同劉Sir講，沙田愉翠苑O座低層4室，舊年白居二措施推出後，業主叫320萬元放盤，最近都接受現實，減到278萬元賣咗，個價近排都未見過咁低，實用呎價約5,388元。

海怡狂劈四成租出

私樓租金繼續跌，中原盧鏡豪話，鴨脷洲海怡半島23A座有個高層相連租盤，放咗租四個幾月都未租出，由於個單位對正港鐵地盤，減租1.9萬元至有人租，減幅40%，月租都係2.9萬元，低市價26%，建築/實用呎租約19.5/24.8元。

利嘉閣莫家進講，元朗入伙盤尚悅，今個月就有80宗租賃成交，其中，3座低層E室，月租約8,500元租咗，實用呎租約23.9元。