大市經過上周四下挫後，似乎已確認新一輪調整的開始，周五恒指再跌283點，以22,450點收市，已經失守250日線的所謂牛熊分界線水平。由於當晚道指急挫超過300點，而夜期亦隨美股再跌多234點，睇怕港股今日都唔會有運行，恒指有機會下試22,000點關口。

近期物流概念股當炒，北京建設積極拓展物流地產業務，值得睇好。（資料圖片）

過往，每當散戶開始「瘋狂」，就係大市見頂先兆，而「夜店股」MAGNUM（02080）今次招股超額三千幾倍，都反映到散戶開始陷入瘋狂狀態，而MAGNUM股價上周五回落12.67%，以2.48元收市，仲連累埋其他半新股急挫，招股時超額過千倍的米格國際（01247），連招股價都跌穿埋；中國信達（01359）埋單跌咗6%，以5.1元收市。近日獲騰訊（00700）入股的華南城（01668）亦跌11%，即使股價表現一向硬淨的光大國際（00257）亦殺6%，多多少少見到有要錢唔要貨的感覺。

假前入市意欲低迷

事一，由於唔少股份之前累積了龐大升幅，持貨者即使現水平沽貨，利潤依然豐厚，加上臨近農曆年假，投資者入市意欲低迷，在市場缺乏承接之下，相信仍有很大的調整壓力，所以唔使心急撈底。

阿里巴巴宣布入股中信21世紀（00241），刺激股價急升三倍幾，真係好耐都未見過呢類場面，雖然唔知阿里巴巴入股後仲有無後着，但係市場開始尋找「殼股」炒作，但阿莊覺得呢類獲大孖沙入股的公司，好少走漏風聲，保密功夫做得好好，反而傳到通街都知，通常都係流，所以炒殼股見好要識收。

近日市場炒作物流股，中國外運（00598）股價屢創新高，同樣具物流概念的北京建設（00925）亦開始有投資者關注，上周五股價一度高見0.7元，最後雖回落至0.65元收市，但全日仍然升6.55%。目前北京建設主力發展物流業務，目標係建立全國性物流地產網絡，計劃未來五年擁有至少400萬平方米之物流地產可出租面積。

由於電子商貿近年高速發展，帶旺物流業，加上北京建設有母公司北京控股（00392）作後盾，相信在拓展業務方面享有一定優勢，而公司亦正推進在口岸、電子商務、冷鏈倉及其他範疇的物流地產投資，前景絕對可以睇高一線，如果股價隨大市回落，不妨趁低吸納。