銅鑼灣一線街舖吉舖愈來愈多，民生消費為主嘅二線街跑馬地，依家街舖交吉情況就更加嚴重。其中該區嘅「主街」成和道，近排吉舖明顯增加，連同接連的「橫街」，合共有約20個吉舖，業主都肯減租吸客。聽講有個原本由地產代理租用嘅單號連閣樓舖位，業主喺約四個月，已經將意向租金減咗總共4萬元，減幅約25%，目前月租開價約12萬元，貼近之前租金水平。

近月成和道吉舖驟增，部分業主已調低意向租金吸客。

商戶心聲
於昌明街開設茶餐廳約七年的李先生指出，市況淡靜時，業主不加租都未必能成功吸引租客。

於成和道開設文具店近半世紀的李先生認為，舖位業主略為調低租金，可與租戶達致雙贏局面。

跑馬地部分街舖降低意向租金及減租情況

劉Sir早排去跑馬地睇過，喺成和道大街，甚至奕蔭街、昌明街同埋源遠街等「橫街」都有唔少吉舖。

成和道多代理行租

以成和道為例，已有多達8個吉舖，其他「橫街」就更有11個。頭段租戶以地產代理行居多，依家陸續有地舖交吉招租。

當中兩個前租客都係地產代理，其中單號地舖連閣樓，面積加埋約1,500方呎，月租估計超過11萬元。

空置一年 減租求客

上述吉舖租客喺四個月前遷出，業主當時開價每月約16萬元，之後兩度減租共4萬元，減幅約25%，依家月租叫緊約12萬元，呎租約80元，同之前租金比，相差唔夠1萬元。

另外，同街一個原本亦係由代理行租用嘅雙號地舖，面積約1,000方呎，月租約10萬元，去年中租約期滿後，業主再以短約形式租出，相信月租約7萬元，其後長約意向月租叫約12萬元，近排再減至約11萬元，減幅約8%。

跑馬地陸續有舖位減租，部分成功租出。有代理報料，成和道單號低層部分，面積約4,000方呎，業主月前意向月租金約20萬元，較前租金大增逾66%，近排劈租5萬元後，以每月約15萬元租出，呎租約38元，較原先意向低約25%。

至於區內橫街之一嘅昌明街，代理話，條街一個交吉約一年嘅地舖，面積約900方呎，原先月租約7萬元，最後業主減租至約6.5萬元租出，呎租約72元，較前租金低約5,000元。

另外，喺條街開設茶餐廳約七年嘅李先生都話，跑馬地食肆十居其九都係做街坊生意，淡市嗰陣，業主唔加租都未必有人肯租。