美匯指數繼續整固，一眾外幣大交易框架相當明顯，如歐元兌美元以1.33至1.38為限、英鎊兌美元則於1.6250至1.6600高位整固。雖然歐洲經濟復甦唔平均，但歐元又跌唔落，而葡萄牙十年期債息更跌至4.85厘，為一○年八月以來第一次，亦限制匯價進一步下跌。市場似乎正醞釀一個爆邊的機會，但卻毫無藉口。

睇睇日曆，下一個最好藉口自然係本周美國聯儲局主席伯南克卸任前最後一次主持的聯儲局議息會。雖然月初非農數字曾經嚇一嚇，但睇番早前褐皮書，美國經濟仍溫和擴張，相信聯儲局會繼續減少100億美元的買債規模至650億美元。

近日英國樓市數據仍然良好，睇嚟投資者會繼續憧憬英倫銀行會加息打壓樓市，加上有報道指國際貨幣基金組織或會上調英國經濟增長預測，英鎊更加易升難跌；惟如果聲明暗示加快收水，相信最強的外幣同樣無可避免下跌，已經弱勢的自然更難翻身。