蛇年樓市交投「勁縮」，新一年將至，各大地產代理行都希望擺脫霉運，振奮員工士氣，紛紛將開單利是加倍獎賞員工。其中剛晉升為美聯物業（01200）住宅部行政總裁嘅布少明同劉Sir講，公司啱啱決定咗，向初一至初三成功喺新盤開單嘅員工派發最高三千元開單利是，可以話係歷來最多。中原地產亦話準備咗一百萬元嚟派開單利是，利是金額更較去年倍增。

美聯布少明預期，新春前後新盤市場仍會繼續興旺。

中原陳永傑稱，部分分行會在初二至初四照常營業。

新春代理開單利是比較

人稱「布少」嘅美聯布少明話，美聯員工喺初一至初三促成交易都可以攞到開單大利是。

佢話，新盤有三千元、二手買賣有二千元，而租務成交都有一千元，其中二手買賣同租務，利是金額比舊年一千同五百元，多一倍。另外佢哋全線分行初三啟市，個別就「全年無休」。

同系嘅香港置業高級執行董事伍創業就話，分行營業時間大致同美聯相若，都希望新一年有個好兆頭，所以農曆初一至初四促成買賣同租賃嘅開單利是，分別係「好意頭」嘅一千八百同埋八百大元。

愛蝶灣無契搶高14%

至於競爭對手嘅中原地產，佢哋亞太區住宅部總裁陳永傑話，因為今年紅假較以往多一日，所以全線分行初五先啟市。

但中原地產部分會新年初二至初四開工，為咗鼓勵員工，公司預備咗一百萬元嚟派「開單發財」利是，分別係每宗買賣二千元、租賃一千元，比舊年多一倍。

另外，尋日環亞拍賣兩伙無契單位，劉Sir都有去睇過，其中筲箕灣居屋愛蝶灣8座極高層J室以410萬元成交，比開拍價360萬元搶高14%，建築/實用呎價約7,231/8,471元，而一般有契樓估價約500萬元，屬於合理價。

陳應佳：唔入市着數

資深投資者陳應佳都有到場，但覺得無契樓同市價得兩成折讓，實在太貴，所以無舉手競投。

陳應佳仲話，聽專家講今明兩年樓價起碼跌15%，自己亦都睇淡後市，而手頭物業普遍租金回報有6厘，依家唔買唔賣就最着數。

另一資深投資者伍冠流亦同劉Sir講，目前樓市靜到不得了，同樣睇淡後市。

但佢就覺得今年整體樓價只會跌幾個百分點。不過，細價樓有需求，應該唔使太擔心，如果有筍貨都會繼續入市。