第二批白居二又「嚟料」，但依家居屋個價已經升咗唔小，相比未補價公屋買賣盤仲有百幾萬放盤，即刻變晒搶手貨。其中坐落東南九龍一帶嘅黃大仙鳳德邨、竹園北邨同黃大仙下邨，喺呢幾日睇樓量佔同區成個免補價市場四成，比上次白居二推出初時多咗至少30個百分點，依家區內公屋只約120萬元就可以上車。

近期黃大仙一帶的公屋，樓價約百二萬元已有貨揀，成次批白居二客的搶手貨。（資料圖片）

去年買賣登記宗數較多的公屋屋苑

富誠地產陳錫金同劉Sir講，免補價居屋個價升咗，相反東南九龍一帶公屋，樓價約120萬元已經有貨揀，成為新一輪白居二客嘅搶手貨。

鳳德綠表賣189萬

好似近排區內公屋睇樓客，佔全個免補價市場大約40%，同第一批白居二推出嗰陣公屋睇樓只佔大約10%比，比例大升。

黃大仙下邨龍裕樓高層三房單位，減18萬元即刻畀個綠表客以約220萬元買咗，實用呎價約3,971元。

近排公屋頻頻有成交，富山地產何美英話，同區鳳德邨黛鳳樓中層單位，綠表價賣189萬元，實用呎價4,247元。

至於免補價居屋都有成交，祥益林英傑話，屯門兆麟苑F座高層5室，畀綠表客以233.4萬元買咗。

牽晴間300萬失守

其實睇番中原地產嘅公屋報告，上年公屋有481宗二手買賣登記，加埋成8.42億元，比前年多咗11.3%及29.5%，宗數係三年新高；青衣長安邨全年有36宗買賣，係交投最旺嘅屋邨。

私樓無運行，二手業主繼續減價，利嘉閣陳維進話，藍田麗港城15座低層大兩房單位，減價38萬元，賣咗442萬元，呢口價成半年未見過，建築/實用呎價只係6,657/8,467元。

中原指出，粉嶺牽晴間兩房成交價跌穿300萬元，當中2座低層D室，減咗14萬元，以296萬元易手，實用呎價約7,708元，低市價4%。

今年樓價看跌10%

銀主盤同法院物業都低價吸客，屯門海景花園7座低層B室銀主盤，連車位下個星期開拍價460萬元，低市價約10%。

另青龍頭豪景花園22座極低層B室，連雙車位承法院令呢個月底以850萬元拍賣，比市價亦低15%。

其實連香港置業伍創業都估，今年整體樓價要跌10%，但豪宅就會價穩量跌。