市區土地新供應愈來愈少，政府推行嘅工廈活化措施，除咗使現有市區舊工業區工廈增值之外，亦大大改善區內環境。新地（00016）嘅葵涌聯泰工業大廈早前獲准由工廈轉為零售用途，計劃做一幢銀座式購物商場，相信係○九年活化措施以來，首個工廈改裝做商場項目，呢幢工廈會同對面同系嘅商廈九龍貿易中心（KCC）串連埋，打造成為樓面共約17萬方呎嘅零售購物空間。

葵涌聯泰工業大廈活化為商場後，將有接駁天橋連貫對面的九龍貿易中心。

新地代理鍾秀蓮

聯泰工業大廈活化詳情

新地代理租務部總經理鍾秀蓮同劉Sir講，話唔少工廈又殘舊、空置率又高，但又位處市區，透過活化工廈唔單止更新舊區面貌，仲可以推動社區發展，而全幢工廈改裝能夠為物業「升級改造」，比重建更加環保。

每層達萬呎 主題各異

佢話項目會發展成銀座式商場，外面係大型玻璃幕牆設計，會有露天陽台同綠化部分，不過大廈本身機電配套較落後，需要投入更多設施，估計成本比一般重建工廈多。

鍾秀蓮又話，該工廈現時有10層樓面，合共約10萬方呎，每層約1萬呎，計劃每層有唔同主題概念，依家開始預租，希望引入多間特色餐飲食肆、同埋生活百貨店，其中餐飲食肆預計佔總樓面約30%，新商場預計一五年中開業，目標客戶冀涵蓋至美孚、荔景、荃灣等地，而年齡層對象介乎25至49歲。

KCC明年開業 天橋接駁

毗連嘅KCC同港鐵葵興站現有接駁天橋，未來會貫通埋新商場，而KCC亦會透過租戶重組、同重新規劃商舖等配合發展，該廈第1、2期共有零售樓面約7萬方呎，涉及約30個租戶，大部分為餐飲食肆，其中2期約21個租戶全新引入，預計明年農曆年後開業。

另外，KCC有超過300個車位，計劃預留其中100個畀新商場。睇番資料，新地喺一一年以約2.23億元購入聯泰工業大廈，早前獲地政總署批出補地價712萬元，佢話有關補價費用係為興建一條連接港鐵嘅天橋；集團未來以活化工廈為拓展方向，範疇有商場及寫字樓等。