上星期五晚，多得幾個財金官員，為已經水浸的股市火上加油，美國亞特蘭大聯儲銀行行長洛克哈特接受訪問時預測，聯儲局可能在三月前的三次會議上，把減少買債規模列入議程。不過，聯儲局好大可能維持寬鬆政策一段時間，甚至維持數年。

太陽日誌

綜合大行預測哈電業績（人民幣）

歐洲央行總裁德拉吉承認歐元區形勢已有所改善，但未來仍面對挑戰，亦指歐元區超低息未致使金融市場出現不穩定情況。同日，歐洲央行管理委員會委員諾沃特尼預期，面對歐元區經濟長時間停滯，在可見將來，歐洲央行加息可能性唔大。上述言論，刺激歐美股市上周五高收，十年美債息回落3點子至2.75厘，道指升54點，報16,064點再創歷史新高。

三中全會改革內容塵埃落定，股市由最初當佢無到，幾日內態度一百八十度轉變，另一現象是上周資金由初期追逐三中全會改革涉及行業，到上周四、五純綷追落後，連航運、煤炭及航空股都唔放過。

中資股有機炒轉角

事實上，國企及A股經歷近四年有波幅無升幅的悶局，早就有不少基金慣性維持相對高的現金比重，故一個突變令市場深信，可以令中期氣氛逆轉的催化劑，對股市的刺激是不能看輕的。

而A股大落後於歐美股市，加上歐美央行就退市的態度曖昧，已迫使基金經理不能再抱住戰戰兢兢的心態入市，唯恐再一年落後於人。就目前處於歷史低點的股票估值，史提芬認為今次是幾年來較大機會成真的中資股轉角市，尤其上周中港股市，冷對較預期疲弱的滙豐十一月製造業PMI數字，較樂觀預測，是大市年底前有條件挑戰25,000點大關。當然，大前提是聯儲局千祈唔好在十二月議息時提出退市。

早前話水泥股可以諗追落後，上星期所見，中國建材（03323）及海螺（00914）走勢都相當唔錯，但上周四、五成交縮得太勁，反而水向低（估值）流，台泥國際（01136）破晒位，純睇落後唔睇短期業績的話，似乎西部水泥（02233）都要吼實。

仲有無滄海遺珠？睇來睇去剩低核電相關設備股可以諗，包括哈爾濱電氣（01133）、上海電氣（02727）及東方電氣（01072），三股之中又以哈電由六月低位反彈得最少。其中期業績在令人失望，訂單推遲及取消的拖累，半年盈利跌46.5%至3.8億元人民幣，惟上半年新簽訂單與去年同期比較稍有改善，去到252億元人民幣，加埋中國電力企業聯合會預測數據，今年全國新增發電機組容量9,000萬千瓦，下半年佔5,800萬千瓦，接單量及客觀的市場環境顯示，似乎電力設備新增訂單可能已見底。

計及今年業績預期大減三成六之下，哈電市盈率仍然只得6.4倍，市帳率0.44倍處歷史低位，點計股價再跌的空間都唔大，過去三個月股價幾次受制於5.2至5.4元之間，如果能夠衝破阻力區，趁短期落後股雞犬皆升，博一至兩成升幅應該唔算奢望。