政府年初公布本年度賣地計劃嘅時候，講過話有22幅地要改劃用途，所以大部分地皮要下半年先可以推出，但唔經唔覺距離公布本年度最後一季賣地計劃嘅日子愈嚟愈近。劉Sir發現，部分未改劃地皮完全「未郁過」，包括三幅屯門掃管笏地皮，計落有近1,600伙住宅供應。地產界老友話，地皮要完成改劃程序最少要一年半載，睇怕部分地皮隨時會成為「跨年度」供應。

屯門掃管笏冠發街附近地皮屬本年度面積最大住宅地，佔地約63.4萬方呎。（資料圖片）

隨時成為「跨年度」供應的3幅屯門掃管笏住宅地

由於賣地表有接近半數住宅地要進行改劃用途，其實劉Sir對推賣地表全數地皮共約1.36萬伙呢個「實牙實齒」承諾，早就無太大期望。而政府喺早前就話，22幅未改劃住宅地，當中有七成已完成或已開展法定規劃程序。

兩幅完成改劃 僅佔9.1%

不過，其實唔少仲喺初步階段，依家都係成功推過屯門湖安街與湖康街交界，以及西貢篤康村路呢兩幅完成改劃地皮，佔未改劃用地比例僅約9.1%。而該批未改劃地皮當中，更有三幅屯門掃管笏用地至今仍未向區議會諮詢，按照現時嘅進度，就算已完成改劃程序嘅地皮都亦未必趕得切本年度推出。所以劉Sir保守估計，嗰三幅掃管笏地皮，或者有機會成為「跨年度」供應。

其中佔地達63.4萬方呎嘅屯門掃管笏冠發街附近地皮，係賣地表內最大一幅，以1.3倍地積比率計，總樓面約82.4萬方呎，假設每伙平均面積約800方呎，地皮係少有可提供逾千伙嘅大型發展地皮，連同屯門市地段505及506號兩幅地，估計有近1,600伙供應將會大幅滯後。

其實仲有兩幅尚待開展規劃程序嘅沙田石門用地，但經已落實改做公營房屋。至於九龍牛池灣豐盛街，以及啱啱完成諮詢嘅九龍鯉魚門徑住宅地，相信要喺未來一年推出都有難度。

業界：改劃需時兼量多

事實上，透過改變土地用途係政府近年增供應嘅手段，不過，高緯環球張翹楚話，就算地皮條件幾適合改劃住宅，要由諮詢到完成改劃，一年半載點都走唔甩，加上政府審視地皮無時間表可言，隨着須改劃用途嘅用地愈嚟愈多，改劃進度只會嚴重落後。