聯儲主席伯南克，提前同候任主席耶倫夾晒口供，話即使失業率跌到6.5%樓下，聯儲局都唔急於退市，買債步伐仍要視經濟前景而定。可惜，自從五月話退唔退之後，加埋任期進入倒數階段，市場似乎對伯南克言論反應愈來愈冷靜對待，前晚美債息微彈，美股三大指數窄幅上落，微軟收場，顯然華爾街投資者心目中，已經提前為聯儲局做權力移交。

太陽日誌2013/11/21

綜合大行預測中海發展業績（人民幣）

十月內地金融機構新增外匯佔款4,416億元（人民幣．下同），足足比九月的1,263億元多三倍半，去到九個月新高，難怪人行公開市場操作，九月投放1,040億元之後，十月已經轉為淨回籠1,575億元，以吸走外來湧入的熱錢。事實歐、日、英、澳央行近日有意無意表示放水動作會持續，相比出晒力撳住個CPI同埋愈壓愈升嘅樓價，中國貨幣政策取態同外圍簡直有一百八十度分別，加埋周小川文章啱啱提及未來擴大人民幣波幅區間，加快升值步伐，睇怕今趟賭人仔升值嘅熱錢會更有恃無恐，新一波升值潮唔使幾耐將揭開序幕，趁三中全會概念炒得有點膩，看官們不妨研究研究得益於人民幣升值的股份，例如航空股，話唔定下一浸升市會輪到佢哋。

港股調整壓力有限

周一過千億（港元．下同）成交勁升之後，一連兩日港股都以橫行去消化升幅，好明顯，市場上等買貨嘅基金經理要比食胡離場嘅多，形成個市調整壓力始終有限。尋日恒指升43點，報23,700點，以全日153點波幅，仲有710億元成交算係咁，50隻藍籌32升15跌，兩隻內險股未肯抖氣，國壽（02628）及平保（02318）再升0.6%及2.1%。

話口未完，叫大家留意同三中全會關連性較低的落後股，尋日熱錢由三中全會改革概念股流到其他板塊，兩隻半新網股雲遊（00484）及博雅（00434）分別彈4.2%及6.4%，工業、航運及造船股見鑊氣，熔盛（01101）升20.8%、中航工業（00232）升17.1%、廣船（00317）升12.6%，三一（00631）升12.6%，中航科工（02357）升7.2%。筆者有睇開熔盛，由招股價8元撻到落早排0.74元至反彈，話穩陣都係呃你，個人對佢有心理陰影唔會介紹。事實上，睇反映國際乾散貨運費的波羅的海指數（BDI），近排波動程度媲美癲狂蚊型股，十月初見過2,100點樓上，尋日執筆時得番1,507點。

話雖如此，航運股估值預示行業低潮，亦係不爭事實，即使龍頭股如中海發展（01138），由六月3元樓下彈番去5元，一三年市帳率仲係講緊0.6倍，都未番到○七年金融海嘯低位0.7倍，遑論近十年平均值1.82倍。集團首三季勁蝕11.9億元人民幣，沿海的煤、鐵礦石運費仲係低企，船隊幾乎蝕住開工，明年業績唔見紅都偷笑，但都係同一句，勝在市帳率折讓夠大，正路當然追大孖沙蜂擁搶入的券商或內險股，但有畏高症兼有貪平習慣的，或者航運股係你杯茶。