旺區街舖租金貴，唔少商戶變陣，搶租樓上舖，刺激呢類舖位租金大升，有啲新租租金仲倍增，升幅媲美一線街舖。聽講旺角西洋菜南街雙號低層有個罕有複式舖，只係放咗一個星期，即刻畀間美容專門店以每月約5.5萬元預租，新租金升幅達1.2倍。有代理話，銀座式商廈愈嚟愈受歡迎，樓上舖業主抱唔憂租心態，估計租金出年平均加幅最少有七成。

旺角西洋菜南街為年輕人及內地旅客喜愛的購物熱點，故區內樓上舖發展最為成熟。

零售購物區樓上舖租金升幅

香港置業置尊旺舖營業董事林偉文表同劉Sir講，以核心零售區計，樓上舖租金只等於地舖租金約二十分之一，故喺市差嘅時候，租賃成交量同金額都冇乜大影響，最重要係銀座式商廈開始受市場歡迎，大家已習慣「上樓」消費，需求大增下，相信租金出年會最少有約七成增幅，升幅將跑贏大市。

近年連鎖珠寶金行及化妝品店搶貴晒西洋菜南街地舖租金，有小商戶頂唔住貴租，決定唔租地舖，轉租樓上舖。

金馬倫道新約貴60%

有代理報料，有小商戶原本想喺西洋菜南街搵舖擴充，點知心儀地舖個業主唔肯收平啲，堅持嗌租近10萬元，同佢預算超出實在太遠，所以決定轉租該街道雙號低層複式舖，面積約2,000方呎。

個樓上舖內籠唔錯，有落地玻璃，同埋近大型商場，所以拍板以5.5萬元承租，呎租約28元，比起前租金大升1.2倍。

佢仲話，有個原本租緊尖沙咀加拿分道地舖嘅老友，早排因業主加租，轉租咗同區金馬倫道雙號1樓部分樓上舖，面積約5,000方呎，比原本租用舖位面積大超過一倍，新租金每月大約16萬元，呎租約32元，較新址原租金高約60%。

時裝店搬竇慳租五成

港島區方面，有間中型連鎖時裝店早年打出名堂，開始有熟客搵上門，長遠為咗慳租，早排終止其中一間灣仔區分店後，轉租軒尼詩道單號1樓部分樓上舖，面積約6,000方呎，同舊舖面積差唔多。

是次每月租金約27萬元，呎租約45元，雖然較新址前租金升1倍，但比起舊有租用地舖租金，慳咗約莫五成。

另外，有間原先喺北角租舖嘅髮型屋，認為灣仔客源較廣，早排轉租灣仔堅拿道西雙號1樓部分樓上舖，月租約16萬元，較新址前租金升33%。