獲提名出任下屆美國聯儲局主席的耶倫，繼續「鴿派」本色，令市場對不會退市的信心愈來愈強，大行估最快明年三月先退市。耶倫亦暗示在就業同通脹問題上，她是「重就業、輕通脹」，而退唔退市就視乎就業情況同經濟增長有無改善而定。

歐元兑美元走勢

講到經濟，自然就要睇消費開支，要美國人增加消費開支，不外乎睇三個情況：就業、股市同樓市。三個因素之中，美股明顯有放水托市之嫌，睇吓咁樣會唔會令到下周四嘅感恩節銷情有所突破，所以今個星期嘅樓市數據同埋零售銷售都值得留意。

今個星期對美元就應該保持中立，美匯指數三星期前喺79明顯見支持，但反彈至81.30水平附近又見沽壓，基本上大區間已經劃咗出嚟，例如歐元區間介乎1.33至1.38，1.3550似乎在區間中間，揸定沽都相當尷尬。不過，既然歐元區對歐元過強有微言，歐元再大升機會不大。

外幣投資其中一個口訣係「揸強沽弱」，想買美元都應該避開基本因素強嘅貨幣，如英鎊以及有加息機會的紐元，相反沽貨選擇就有歐元、日圓同埋澳元，衡量過值博率，仍然以歐元比較吸引，今個星期如果見到1.3620不妨試沽，升穿1.3680止蝕，目標先睇番1.3440。