近年尖沙咀海防道已成為內地旅客「血拼」熱點，其中近中段位置藥房租緊嘅「鐵約」舖，業主依家連約放售嗌價最少5億元，計起上嚟呎價超過60萬元。若果成事，呎價將創九龍街舖呎價新高，而金額就創該街道街舖成交價新高紀錄。

尖沙咀海防道鮮有業主賣舖，其中連約放售的「鐵約」舖，叫價最少五億元。（資料圖片）

海防道地舖放售及成交個案

今時今日嘅海防道地舖租戶，除咗鐘錶及時尚貨品林立之外，當然唔少得內地客最鍾意嘅藥房，藥房承租能力強勁，中原（工商舖）商舖部蔡志聰（Alex）同劉Sir講，由投資者吳金福或有關人士持有嘅32至34號地下D舖，面積約830方呎，藥房租客啱啱主動提出續租，新租金每月加到約110萬元，呎租約1,325元，加幅超過83%。

同時，業主睇好個舖租客「背景好，租金高」，即刻連約放盤嗌最少5億元，同佢舊年購入價約1.53億元比，高出咗約3.47億元，加幅差唔多2.3倍，用依個放盤價計，租金回報都有約2.6厘。

葵涌紅A全幢十億洽

有區內代理話，依家海防道地舖業主好難叫到佢地賣舖，聽講條街有個面積大約800多方呎嘅舖，業主依家自用，最近話若有客畀到8億就會賣，呎價近百萬元，貴過銅鑼灣波斯富街77至83號地下K舖，果個舖王呎價都只係近90萬元。

近排「舖王」鄧成波頻頻換貨，聽講佢舊年向恒隆地產（00101）或有關公司以逾5億元購入嘅葵涌紅A中心全幢工廈，依家有客洽購，涉資逾10億元，呎價約3,300元。若果成事，一年多升值近90%，個出價咁理想，事關幢大廈今年九月簽咗特別豁免書改裝做酒店。

好時地舖減價仍賺12%

投資者「物流張」話，啱啱減價120萬元賣咗尖東好時中心地下11號舖，成交價約3,380萬元，佢笑住話揸咗約十一個月，帳面袋352萬元，賺幅近12%。租賃方面，中原鄭莉澄報料，連鎖服裝店租咗近三十年嘅佐敦彌敦道363至373號地下B其中（365）號舖，租期出年年初到期，業主依家嗌定意向新月租約75萬元。