前晚，下任美國聯儲局主席提名人耶倫，認為目前美國失業率7.3%依然偏高，經濟復甦未達水平，市場解讀為退市有拖無欠的預告，十年美債息回順，一度回到2.7厘附近，道指從早市最多跌78點，拗腰倒升70點，收15,821點創埋收市新高，可見全球熱錢依然戀棧華爾街，唔炒經濟復甦，就炒押後退市，總之藉口多的是。前日無端端大插437點的港股，尋日藉退市預期降溫，反彈185點，報22,649點，但主板成交卻由周三的621億元縮番落542億元。

太陽日誌2013/11/15

綜合大行預測海螺業績（人民幣）

要同看官講聲sorry，皆因前日騰訊（00700）季績唔好，股價隊穿四舊以為實死無生，意外是前晚美國上市的內地網股統統反彈，結果尋日騰訊不單止無跌，仲要升4.6%，報410.8元。尋日已提過季績條大數（純利）麻麻，但經過分析員會議同管理層會面後，一班賓架們頗滿意佢網遊毛利率keep到，及手遊生意發展比預期快！講到尾，同近期美股一樣，當大眾睇好的時候，總係想辦法搵到值得憧憬之處，話PE高咩？即刻會有人笑你；網股邊有人睇PE架！

三中全會塵埃落定，望住五千多字的公報，金融改革輔以環保、文化及TMT等新興行業，範圍大兼且無短期政策指引，相比之下，環保股是比較大路兼易捉，睇住入冬後中南海霧霾指標日日徘徊二百幾三百，實在唔到領導人唔急。可再生能源股中，太陽能股已經炒咗一排，最近國家能源局的文件制定一四年中國光伏發電規模的安排方案，預料明年新裝機組12GW，比今年的6.5GW幾乎翻一番。

興業太陽能有睇頭

保利協鑫（03800）尋日已經作勢挑戰五十二周高位2.65元，但筆者同佢八字唔夾，都係得個睇字，反而留意隻興業太陽能（00750），前日以每股8.1元批4,000萬股畀六個投資者，之後試落8.2元後跌唔落，尋日已經企穩兼炒番上去。主攻產業鏈下遊EPC的興業，今年基本上全年都無炒過，消化一二年下半年的升幅，批完股唔散，要睇喇。

只聞樓梯響不見有人來的房產稅，睇嚟短期要喺全國大面積推行的機會唔大，意外是睇好的碧桂園（02007）及世房（00813）比較硬淨外，其他無乜動靜繼續牛牛皮皮。反而水泥股有留意必要，一來估值仲係平，其次大水泥商今年達成協議，不再鬥劈價，加埋近期華南一帶需求回升，水泥價有穩步向好趨勢，相信短期會有更多大行調高一四年業績預測，唔使講，揀就一定揀番行業龍頭海螺（00914），近三個月在25至27元之間橫行，只等一個突破的時機。