二○一三年好快就會過去，但發展商推盤意欲仍然有增無減，市場上兩個提供逾千伙嘅大盤不約而同部署本月下旬開售搶客。其中南豐位於東涌嘅昇薈，示範單位明日起搶閘開放，項目市值超過100億元，首批約300伙嘅價單會喺短期揭盅，料兩周內開售。至於信置（00083）等嘅灣仔囍滙第二期尋日亦都啟動推廣攻勢，樓書估計日內上架。

昇薈售樓處提供4種不同間隔示範單位，面積介乎一房的445方呎至四房的1377方呎。

信置田兆源（左）昨與合和實業王永霖一同啟動囍滙第二期的推廣攻勢。

本月下旬部署開售兩大新盤

昇薈市值料逾百億

事實上，近排各大發展商爭相部署推盤，新盤推廣活動突然大幅增加。劉Sir尋日就連趕幾場收風，期間南豐董事總經理蔡宏興透露，東涌已經有五至六年無新樓賣，旗下昇薈屬大型發展項目，共提供1,419伙，估計市值超過100億元，不過集團相當惜貨，無諗過今年盡推全數單位發售。

南豐地產部總經理鍾志霖就話，昇薈設喺九龍灣嘅售樓處提供4個經改動同4個未經改動示範單位，間隔包括一、二、三及四房，明日起開放畀公眾參觀，希望兩周內可開盤，首張價單料短期公布，涉及料約300伙，當中可能會包括特色戶。

囍滙提供超過千伙

另一邊廂，囍滙第二期亦都諗住出擊。信置營業部聯席董事田兆源尋日就同合作夥伴合和實業（00054）執行董事王永霖齊齊現身，為該盤啟動推廣攻勢。田兆源話，項目樓書可望日內派發，希望今個月可開售。該項目提供1,096伙，標準戶面積334至1,147方呎，當中唔少係細單位，其中一房戶佔比例近48%，開放式及兩房戶各佔約20%，三房及特色戶則各佔約6%，特色戶中包括面積500多方呎一房複式戶。

昇柏山全面提價8%

雖然唔少新盤部署推出，但賣緊嘅盤都冇有怕。好似長實（00001）嘅荃灣昇柏山只係賣剩55伙，所以決定全面提價8%，加價後平均實用呎價10,757元，如果用即供計均價約9,278元。該公司執行董事趙國雄話，新盤熾熱，加幅8%已經好克制，仲係平過市價咁話；該盤迄今累沽347伙，佔全盤總數逾86%，套現約19億元。

趙國雄仲話，集團年內售樓目標約300億元，但將軍澳日出康城3期緻藍天同荃灣環宇尚待批預售文件，希望可以盡快推盤。又認為低息環境持續，所以睇好未來樓價會穩定向好。