魚缸Blogger：世達科技博上0.6元

九月創咗五十二周高位0.71元嘅世達科技（01282），四條一光棍節當日股價跌到落0.46元，尋日因為增持NASDAQ上市公司Synaptics股份消息而反彈，逆市升6%，收報0.53元，今轉如果可以突破埋100日線0.56元，或者企穩10日線0.51元，可博佢踢上6毫子。

世達今年上半年扭虧為盈，錄得純利6,117萬元，前年同期則蝕2,849萬元，原因係期內賣咗瑞典Fingerprint Cards AB同日本DDS, Inc.股份產生巨大投資收益，而且公司預期截至今年底止全年將會錄得純利（去年虧損5,460.8萬元）。

至於今次世達增持嘅Synaptics，係一間用家介面解決方案研發商及供應商，同時亦係公司嘅主要客戶。另外，公司九月額外認購同業挪威IDEX ASA 1.37%股權，後者擁有生物識別系統知識產權，除可產生協同效應外，亦可促進長期戰略合作。