隔晚道指升21點，港股完全唔跟美股走，周一挾高325點後無以為繼，恒指昨日低開18點，之後的15分鐘淡友起動，連環殺落，由23,075點插到22,857點先停手，其後受A股帶動跌幅收窄，惟始終欠缺氣氛，收市報22,901點，跌168點，成交轉弱，主板只有494億元。

恒指期貨走勢2013/11/12

昨日大市沽空金額43.33億元，沽空佔比8.77%，沽空情況並不嚴重。市場觀望三中全會閉幕，無特別焦點下，資金繼續炒作細價神仙股，但經驗之談，這類齋炒作的爆升日子唔會好長久，需要一個有力的催化劑出現，後市才能較明確。期指昨日收市跌163點，除淨後低水12點，成交張數6.2萬張。

自九月十九日恒指觸及23,554點，接近兩個月的波幅只有914點，成交是飽你唔死，餓你唔親，無論是揸貨或沽倉過夜都隨時做錯邊，就算即日陷阱也不少，在單邊趨勢確定前，策略還是先縮減注碼，有心水才落場。