內地經濟迅速發展，近年中資財團喺本地商廈市場相當活躍。劉Sir收到風，恒地（00012）或有關公司旗下嘅油麻地九龍行，市傳獲中資背景財團以近20億元洽購全幢，若交易落實，成交呎價近1.8萬元，或成九龍商廈呎價新指標。新地（00016）原計劃發展住宅荃灣傅屋路項目，亦向城規會申建1幢27層高寫字樓。

恒地旗下九龍行全幢傳獲中資財團以近20億元洽購。

恒地主席李兆基

今年全幢商廈買賣個案

中資財團紛紛殺入本港商廈市場，近年全幢商廈交投都幾旺。劉Sir八到，上述油麻地九龍行，啱啱以近20億元全幢獲洽購，大廈總樓面約11萬方呎。

隨時孭稅高達億七

恒地於九四年以超過9億元買入九龍行，若交易落實，該幢商廈將升值超過10億元，而成交呎價近1.8萬元，更勢成九龍商廈新指標。該商廈係1幢23層高嘅寫字樓，地下至3樓為約2.9萬方呎零售樓面，4至22樓則是辦公室樓層。

劉Sir仲知道，呢位神秘嘅買家有中資背景，估計須付約8.5%雙倍印花稅，單計稅款都要1.7億元。不過內地企業勝在夠「疊水」，相信要擴充都唔會太計較嘅。

新地荃灣轉建商廈

講開中資財團，其實今年都頻出沒購商廈，最矚目係中國移動（00941）或有關公司，動用約11億元，買新地旗下葵涌九龍貿易中心其中5層原租用嘅樓面作香港區總部。

其實本地發展商都比較睇好商廈前景，上述新地荃灣傅屋路13至17號項目，就放棄早年獲批嘅住宅發展，剛向城規會申請興建1幢27層高嘅寫字樓，總樓面約12.54萬方呎。

劉Sir知道，呢個地盤喺一一年已獲城規會批准發展1幢41層高住宅，提供約136伙。