上周歐洲央行突然減息，美國就業數據又顯示退市之日可能不遠，三中全會在本周二完結，但相信唔使等會議完，今日市況將可預示本月餘下時間市況走向。由於預期後市波動性將擴大，暫宜以靜制動，事關一旦後市確認走低，呢浪調整冇咁快完結。

在三大中資電訊股中，中移在基金心目中的地位下降，是不爭的事實。（資料圖片）

上周魚缸有個現象，就係先後有二、三線出現「斬倉」疑雲。上周美麗家園（01237）股價由前周五收市價1.42元，急挫至低位僅0.72元，公司話不明股價波動原因，見其後股價雖有反彈，但未能重上1元樓上，上周五收報0.88元，一周唔見38%。

俊知股價大幅波動

另一隻係俊知集團（01300），上周五中午前開始現沽壓，午後股價一度急挫47%，低見1.42元，其後市傳持貨53%的大股東否認有按倉，又聞管理層收市後會同分析員解話，股價跌幅才收窄，收市報2.18元，單日跌18%，成交達到2.76億元，公司市值降至24億元。所以話，有時人在魚缸，都真係幾提心吊膽，買着呢類股，無端端大幅波動，持貨市值突然唔見一大截，落車一殼眼淚，唔落車又驚拉閘得個桔，缸邊友惟有自求多福！

大摩的資金流報告顯示，截至上周三的一周，流出新興股票基金的資金有10.4億美元，流出最多資金的板塊按次為金融、資訊科技及消費類股。一般來講，資金流出，唔會咁快又回流，所以奉勸各位別輕率入市撈貨。好似上周五，騰訊（00700）一度失守400元，若然本周三公布季績後確認失守400元關，唔排除要回試350至360元水平承接；至於雲遊（00484），掛牌初期係威係勢，但上周五創掛牌以來新低58.2元，反彈企唔穩喺10日線61.9元樓上，有心理準備繼續向下尋底。

另一隻想講的重磅股係中移（00941），自九月來股價呈向下三級跌，由89元水平轆到落79至80元水平才喘穩，目前14日RSI處38，又未算係超賣。究竟內地4G年底前發牌係「救命草」抑或「催命符」，不得而知，但看來在三大中資電訊股之中，中移在基金眼中的排名下降，倒是不爭事實，日後如何在發展4G業務及維持穩定派息上作平衡，考起管理層工夫。

中移股價在「好消息」公布前浸浸落，難言樂觀。除非4G發牌後，中電信（00728）及聯通（00762）的4G投資金額遠高於預期，否則相信中移股價表現將繼續跑輸。若要博4G概念，阿莊寧揀智能手機股。