零售市況麻麻，吉舖仲愈來愈多，唔少業主變陣，趁聖誕節前「放短租」，今年就罕有喺十月中已開始有短租放盤，咁多區加加埋埋暫時大約有10個短約盤，嗌租平均比長租只係高約3至6%。舖壇老手黎永滔約兩年前買嘅銅鑼灣霎東街原由何洪記粥麵租用多年地舖，交吉已約一年，依家短租有得傾，意向月租金約15萬元，比長約意向租金大幅低出約60%。

銅鑼灣駱克道一帶為遊客集中地，故大型及小型商戶都有興趣尋找舖位作短期租用。

投資者黎永滔稱，舖位租期短不會影響原有回報。（資料圖片）

霎東街2號地鋪連閣樓

市場街舖短租放盤個案

有代理同劉Sir呻，今年舖市特別差，銅鑼灣波斯富街、利園山道、駱克道及旺角彌敦道唔少街都有吉舖。部分業主就趁聖誕節同農曆新年消費黃金檔期「博一鋪」，早喺十月就陸續搵客短租，計吓數，銅鑼灣同灣仔有4個，新蒲崗、旺角同荃灣等加埋約有6個。

黎永滔：有租收雙贏

黎永滔話，由於舖位短租租期只有幾個月，唔會打亂本身投資回報預算，加埋期間有租收，係雙贏局面，佢又話上述霎東街2號地舖面積約1,000方呎，租客舊年年中租約期滿後搬走，之後放租每月約38萬元，依家可以傾短租，意向月租金只係約15萬元，呎租150元，比起長約意向租金低約60%，租期最長可以去到出年農曆新年。

啟德郵輪碼頭正式啟用後，同區新蒲崗街舖租賃成交未見即時受惠，唔少吉咗幾個月嘅舖位都趁機推短租，聽講原由食肆租用嘅仁愛街雙號地舖，租客幾個月前搬走後，業主依家嗌短租，意向月租約4.5萬元，比起長約意向租金只高約6%。代理話，舊年整體零售市況理想，業主意向短約舖位租金進取，一般較長約租金高兩成至四成不等。

賀年化妝品店爭洽

每逢年尾專賣賀年利是封同相關應節物品嘅商戶，同埋連鎖化妝品店都短租舖位。

佢地今年十月初已搵代理洽短租，選址包括銅鑼灣、灣仔同旺角，目標舖位鄰近港鐵出入口及大型購物中心，面積800至1,000方呎，諗住月租金約7萬至12萬元。