華爾街依然陶醉於聯儲局暫緩退市的共識，前晚道指再升128點，收15,746點，再創新高，本來ADR唔多升，多少道出港股唔願跟美股的事實，但勢估唔到，尋日衰到要倒跌155點散場，恒指收22,881點，連跌四日，成交額縮至456億元，兩萬三關口及50日線22,920點雙雙失守，上升及下跌股份數目432及840隻，整體大市點數跌幅雖然唔算大，但升跌股份比例1：1.94，顯示市況都幾弱吓。

太陽日誌2013/11/8

綜合大行預測港交所業績（港元）

賓架線消息，話近兩日A股成交縮晒，但見唔少QFII基金仲係浸浸落，撳住沽。消息話外資行收風，對周六揭幕的三中全會不能抱任何期望，尤其經濟提振措施諗都唔使諗。早兩日總理李克強打晒開口牌，話市場資金已經夠多，足足係GDP兩倍，再泵水只會刺激通脹。

外資行似打定輸數，尋日見到份報告估一四年貨幣供應及人民幣新增貸款增長目標，會由一二年的13%及14%，雙雙向下修訂到12%，加埋近兩日外圍強勢，港股獨弱，綜合種種迹象，三中全會無料到，唔似空穴來風。

基金食胡迹象明顯

社交網站Twitter（代號TWTR）發售價上調至26美元，比之前公布17至20美元的目標範圍調高30至53%，集資額18.2億美元，是去年facebook之後全球最大網股IPO，看官手執報紙時，大致清楚尋晚首日掛牌嘅賽果，但前晚美國上市嘅內地網股好似新浪同百度都有回軟迹象，尋日騰訊（00700）、雲遊（00484）亦然。暫時唔敢講話內地網股熱已經玩完，但基金經理揀一堆帳面累積唔少升幅的outperformer開刀，卻十分明顯。近排濠賭股陰陰跌，尋日連乳業股亦開始受地心吸力影響，蒙牛（02319）高位累積跌一成六。

港交所（00388）宣布季績，首九個月賺35.28億元，按年升9.5%，單第三季則賺12億元，升19.5%，勝大行預期，首三季及第三季每股盈利3.07及1.04元。綜合街外大行預測全年賺46.7億元，目前完成度75.5%，仲差11.42億元就達標。

第三季業績勝預期，主要受惠於投資收入按季大升1.8倍，至1.61億元。期內股市反彈，加上聯儲局話退又唔退，利好港交所手上債券帳面值回升。不過現價估值唔平，追唔追見仁見智，一來近日大市挑戰23,500點唔成，基金又再陷買賣兩閒局面，成交縮水風險增加；再者，第四季投資收入估計最叻都係維持第三季水平。或者LME的交易費上調可以刺激業績，但講緊最快都要到一五年先至反映出來。

周三中午成績表曝光之後，港交所股價只係威得半日，尋日就已經打回原形，九月中的132元可能已經見咗短期高位，按過往經驗，如果股市氣氛差，25倍PE都有機會見一見，以一四年每股盈利預測賺4.53元，即係大約113元左右，投資者不妨再等一等。