三中全會前兩地魚缸資金分頭四散，再唔係就就唔做唔錯。A股尋日持續走軟，滬、深兩市總成交唔到1,500億人仔；港股同病相憐，恒指跌155點，收報22,881點，大市成交僅456億元。

近幾年內地農機補貼有增無減，但一拖的盈利反而呈現倒退。(資料圖片)

技術上，短期恒指上唔番23,000點，沽壓必增，一旦確認10日線（現處23,025點）失守50日線（現處22,920點），且恒指失守橫行區支持22,500點水平，宜待14日RSI（現處45）回落至30樓下，先至好諗入場撈貨。若然如此，炒家有心理準備，今年可能要提早收爐，明年再戰！

熱炒基金股轉弱

事實上，近月唔少基金愛股好似騰訊（00700）、金山軟件（03888）、蒙牛乳業（02319）、長城汽車（02333）都見走勢轉弱；受工潮影響的ASM太平洋（00522），股價由上月高位82元水平回落至65元水平才暫時喘穩；季績欠驚喜兼又傳有官非的白雲山（00874），股價由上月高位38.3元回落至尋日低位僅25.6元。

阿莊已不只一次提醒，熱炒基金股轉弱是市況強弩之末的一個現象，加上呢期好多細價股炒起，恒指牛證街貨又遠大於熊證街貨，故奉勸各位要提高警覺，及時檢討持倉風險。

三中全會前領導人四出考察，總理李克強近日到訪黑龍江，大談農業，更登上一部拖拉機，與農機手談起農機補貼情況，一般推斷扶持農業發展的政策將為三中焦點之一。近日市場亦開始推測明年農機補貼金額，有指約為230億元人仔，較今年的217.5億元人仔有所增加。講到農機，自然想起第一拖拉機（00038），上月醒目錢已進駐炒政策消息，交投轉活，股價由上月初起步位4.8元水平，升至下旬高位5.99元後回吐，至5.21元後轉穩，尋日高位見6.08元，收報5.97元，升1.3%。

平心而論，呢幾年內地農機補貼有增無減，但一拖的盈利卻反呈倒退。今年中期及首三季盈利，同比分別倒退26%及18%，至1.92億及2.6億人仔，主要是農機市場經過近幾年的快速發展後，增速開始趨緩，農機營業收入及除稅前盈利均有所下降，加上煤炭業低迷，令礦卡等其他產品營收亦大減。

綜合券商預計一拖今年盈利約3.5億人仔，現價預測市盈率13倍，吸引力一般。再睇走勢，目前雖尚處七月以來的上升通道，但已升近通道頂，建議持貨者可趁高獲利，候回試上升通道底5.2元水平始考慮翻兜。