舊樓價值愈升愈高，尤其新發展區更會變金蛋！尋日鄰近啟德新發展區嘅九龍城獅子石道，有幢六十多年舊樓以逾2.4億元拍賣售出，買家係寶聲集團。持有該物業1伙住宅嘅小業主周先生話，估計可以分到900幾萬，按佢單位嘅實用面積大約700方呎計，實用呎價約1.3萬元，今次一拍即賣，相信同好多財團睇好該區前景有關。

獅子石道67至71號以2.42億元拍賣售出。

業主周先生（左三）稱對拍賣成交滿意。右為市建局譚小瑩。

九龍城獅子石道舊樓拍賣資料

位於獅子石道67至71號嘅舊樓物業，尋日透過中原測量師行公開拍賣，並以一口價2.42億元由寶聲集團投得，屬於市建局「促進者」先導計劃首個成功拍賣嘅物業。

涉9個住宅3地舖

項目地盤面積約3,534方呎，現為3幢建於一九四九年嘅舊樓，樓高四層，涉及9個住宅及3個地舖，按重建商住物業最大可建樓面約31,810方呎計，每方呎樓面地價逾7,600元。

小業主周先生話對物業成交價感到滿意，笑言價錢高啲就更加好，單位實用面積約700方呎，預料可分到900多萬元，但認為市場樓價頗高，未必會响同區置業，可能會將筆錢用作投資。

佢又同劉Sir講，「個單位係上一代買落，估計賣番黎只係幾十萬，當時舊機場仲未搬走」，但近年都係作收租用途，拍賣前月租萬幾元，佢仲話，地舖可以有超過5,000萬元。

研併購毗鄰發展

中原測量師行張競達話上址具併購潛力，毗連嘅65號有機會通過收購一併發展，又認為成交價屬市價水平。寶聲集團陳耀璋話連地價總投資額約3.6至3.8億，將發展成商住物業，並研究是否併購毗鄰物業發展。其實，寶聲集團近年積極買地同收購舊樓，早前以強拍投得紅磡高山道舊樓物業。

市建局行政總監譚小瑩同劉Sir講，一一年推出中介服務（先導計劃）以來，共收11份申請，處理個案有四宗，除上述項目拍賣售出，暫餘僅1宗可行，市區重建中介服務黃偉權話，餘下處理項目响北角區。