「辣招」之下，兩百萬元以下「細細粒」物業當炒，荃灣新建工廈私家車位求過於供，加上租金回報率有4厘多，聽講近排市場連環錄到唔少工廈車位獲利炒賣個案。其中會德豐地產嘅荃灣ONE MIDTOWN工廈，有個私家車位約四個月間閃電三度售出，炒到120萬元，累積升幅約41%。

荃灣ONE MIDTOWN私家車位目前二手放售價約115萬元起。

荃灣ONE MIDTOWN私家車位目前二手放售價約115萬元起。

兩區工廈車位炒賣獲利個案

有代理同劉Sir講，雙倍印花稅措施下，由於工廈私家車位售價幾十萬元至百餘萬元，轉售成本較低，加埋工廈私家車位長期供應少，比起工廈單位放售盤量動輒過百伙，投資者都認為前者炒得過。

睇番會德豐地產網上資料，海盛路11號ONE MIDTOWN私家車位數目206個。區內地產代理表示，發展商舊年第四季賣，每個售價約72萬至85萬元，由於買家好多都係該廈業主，通常買嚟自用，二手放盤唔多，只有約十多個，有投資者趁機沽貨套現獲利離場。

其中上述1樓單號車位，舊年十月發展商以約85萬元賣出，今年一月二手業主首度以108萬元售予投資者，新買家好快喺二月再以約115萬元「摸出」，五月再有客以120萬元承接，三度轉售後，價格累升約35萬元，升幅約41%。另樓上3樓雙號車位早排以近110萬元賣咗，原業主一年多帳面執36萬元，賺幅約50%。依家該廈私家車位叫價普遍叫高約30至40%，意向價加到約115萬至120萬元。

TML車位摸出 月賺10萬

而億京發展喺隔籬海盛路3號嘅TML廣場，提供私家車位140個，發展商上個月開始賣，每個約120萬元。

另一方面，睇番土地註冊處資料，TML廣場目前錄得逾百宗私家車位一手成交。代理話，其中3樓有個單號車位啱啱以約130萬元「摸出」，投資者約一個月帳面速袋約10萬元，賺幅約8%。

美聯工商助理營業董事李志華話，工廈物業私家車位租金回報一般4厘多，所以市場放售唔多，「辣招」下，稅款較低，自然當炒。