Fundman睇市：內房股 隨時炒多浸

三中全會召開在即，意外是阿爺無刻意出來在金融市場「維穩」，尋日人行個半星期內第三次逆回購，規模80億人民幣的七日期逆回購中標息率4.1厘，同十月廿九日一次一模一樣。睇番七日期拆息，從十月底高位5.55厘，輾轉番到落尋日的4.23厘，但對比十月中旬急升前的3.2至3.5厘，依然高出一截。從逆回購做得「到喉唔到肺」，估計阿爺依家憂慮年終內地通脹再抽上去，多過怕班A股炒家埋怨第四季食唔到尾胡o依o依哦哦。

世房（00813）首十個月合約銷售556.07億元（人民幣．下同），按年升42%，提前完成高管年初訂下全年550億元的銷售目標。以十月的75.06億銷售額看，比頭九個月月均53.4億足足多出四成，黃金周銷情，果然同傳聞中碧桂園（02007）高管電郵內容一樣，夠晒火爆！不過十月中之後，世房股價同唔少內房股一樣牛牛皮皮，同強勁銷售表現背馳。

講到底，基金做定風險評估，預備三中全會有針對樓市政策出台，近期留意唔少大行報告，都估計中央會推埋最後辣招房產稅，但普遍意見係如果不作全國性執行，集中炒得火熱的一二線城市，稅率又唔太辣的話（街外估緊0.8至1%），對內房股影響有限。若然如此，估計當三中全會後一切塵埃落定，內房股或有條件炒多一浸，以反映九、十月的強勁銷情。

追香港資源要諗真

香港資源（02882）將○八年接手的珠寶品牌「金至尊」，以3億元（港元．下同）作價出售五成股權畀六福（00590）。史提芬已經好耐無留意香港資源的消息，不過客觀睇，個人遊帶旺香港金飾業，即使近一年多時間熱度有所減弱，但香港資源居然可以連蝕兩年，除經營不善，真係無乜其他更好解釋，搵行家代為管理（六福顧問費用為6%稅前溢利或者1,000萬元，以較少者為準）未嘗不是出路，不過尋日股價一度翻一番，股民反應真係估唔到咁激。

香港資源無咗五成金至尊收入，加埋六福借埋錢畀佢，批五年期可換股債券，行使價居然仲低過停牌前股價（換股價0.18元），大約等於1倍市帳率，較其他金飾股低一截，樂觀睇，六福執到平貨（不過由於盈利基礎大，滙證話即時幫助唔明顯），但從另一角度，可見香港資源在交易中的議價能力確實麻麻，這或許反映本身的情況，值得股民入市前諗清諗楚。