內地經濟蓬勃發展，已經成為亞洲創造財富嘅樞紐。劉Sir知道萊坊啱啱發表咗第三季《住宅物業環球透視》報告，內地投資者已經成為全球新建豪宅最有影響力嘅買家，佢哋傾向買香港、美國紐約同英國倫敦嘅豪宅，平均消費閒閒哋都要2,190萬元，果然係唔貴唔揀，夠晒豪氣。

內地投資者除首選香港房產外，亦喜愛倫敦的豪宅物業。（資料圖片）

全球新建豪宅最具影響力買家

金融海嘯喺○八年爆發後，唔少投資者都視地產物業為財庫增值手段，內地投資者近年愈來愈有錢，愈有錢就愈豪爽，呢份數據截至今年第三季嘅《住宅物業環球透視》報告提到，當今環球豪宅市場，就以內地投資者最具影響力。

唔知係唔係貪方便，原來內地投資者最鍾意購買香港豪宅，再輪到紐約同倫敦，平均消費約2,190萬元。其實劉Sir唔覺得出奇，近年內地投資者經常「北水南調」嚟港置業，仲要買親都係豪宅物業，順帶一提，香港樓價喺○九年初起，至今已經累積升81%咁多。

星洲人首選倫敦物業

近年亞洲經濟崛起，排第二最有影響力嘅係新加坡投資者，佢哋置業首選倫敦，其次馬來西亞同日本東京，購買每間豪宅平均用約1,800萬元。

至於第三至第五位最有影響力投資者就嚟自中亞及歐美地區，依次為俄羅斯、英國及美國，平均樓價介乎約1,410萬至2,350萬元。香港投資者影響力就排名第六，傾向購買澳洲悉尼、倫敦及東京豪宅，平均樓價約1,640萬元。

不過，或者香港生活比較擠迫，劉Sir就發現到，香港嘅投資者，比較鍾意購買三至四房間隔嘅豪宅單位。

反而上述排名頭五位內地等地區嘅投資者，兩至三房豪宅先係佢哋主要目標。

重視教育及生活質素

綜觀嚟睇，紐約、法國巴黎同倫敦係最受歡迎嘅物業投資市場。至於劉Sir都好奇呢班有錢人用咩準則去揀選投資地點。報告指出，約47%受訪投資者認為有「避風港效應」嘅市場吸引力最大，同時亦愈來愈重視海外投資地點嘅教育及生活質素。