美元捱沽，美匯指數跌至關鍵嘅79水平，依家美元好似打拳咁點數明顯輸晒，不過只要美元捱得過呢round，就有條件喘定抖抖氣，下一回合再嚟過。

不過，歐元喺上周四破頂創新高，但其他外幣都未有跟隨，似乎暗藏殺機，是否大戶刻意舞低美匯指數誘散戶繼續沽美元？睇番歐元區數據，PMI開始回落，德國IFO商業信心亦半年來首次下跌，但歐元對壞消息充耳不聞。

今個星期焦點自然係聯儲局議息會，不過今時唔同往日，九月份大家一口認定聯儲局退市在即，結果一地眼鏡碎，事隔一個月已經無人再認為聯儲局可以退市，因為早前公布嘅非農數據同財政困局都令大家有咁嘅預期，而今個星期亦有九月份零售銷售及標普Case-Shiller樓價指數值得留意。

除咗歐元兌美元有隱憂，歐元兌日圓亦不知不覺間升至接近金融海嘯後新高，再急升機會不大。預期本周初歐元或會借勢再先衝高後回落，投資者可留意歐元兌美元阻力1.3950至1.3980，距離現價只有約100點子之空間，而歐元兌日圓不知不覺間亦升至○九年初的高位阻力138水平不遠，似乎亦未有向上突破的誘因，目前再高追歐元，似乎大有接火棒的味道。

GMO CLICK環球通副總裁 陳健豪