Fundman睇市：網龍 溢價嫌偏高

展望今個星期，北面要關注係何時啟動逆回購番個息落去；至於外圍，周三美國議息，街外九成九估緊聯儲局會因應就業數據及月初政府停工，押後退市時間表，最後會唔會爆九十九倍大冷？另外要留意消息話個別美國鷹派國會議員，準備以「拉布」阻奧巴馬任命耶倫明年接替伯南克出任聯儲局主席，會唔會搞出大頭佛，可以做的就係買定花生等睇戲。

阿里上市或有下文

Twitter上市進入倒數階段，facebook及一眾美國上市中國網股股價都在高位附近，相信阿里巴巴一眾主要股東都已經好似熱窩上的螞蟻，心急到爆，怕錯過二千年後最大科網熱，加埋財爺「要聽取公眾意見」言論向港交所（00388）打晒眼色，睇怕千億集資計劃仲有下集。憧憬阿里捲土重來，騰訊（00700）升1.6%報433元，摩通火上加油，將目標價調高至506元，可惜其他網股有啲跟唔上，半新股IGG（08002）及雲遊（00484）高開低收，分別跌3.8%及0.08%。每股7.77元特別股息除淨的網龍（00777）跌6.5%，報19.18元，計咗除息因素，今個月仍累積升45%，確係誇張。

賣掉最值錢資產91無綫、拎近五成現金出嚟派息後，網龍有嘅仍然係錢，無嘅係極賺錢生意，以填補收入真空。現價有三分之二是對管理層可以透過併購或自行發展一項媲美91無綫業務的憧憬，但筆者認為需要時間證明，咁大溢價總覺得唔多值。

購創銀出手唔算低

尋日賓架消息都話個市獨剩ETF基金相對積極參與，或者因為咁，近排當炒的二三線，普遍都見調整得幾深，不過最反高潮的，肯定是越秀企業收購創興銀行（01111）的交易，出價每股35.69元，相當於中期業績時帳面值的2.08倍，之前炒家賭本地銀行牌買少見少，憧憬五年前永隆以3.1倍市帳率被收歸國有的歷史可以重演，結果消息一出，通地眼鏡碎。創興跌8%，收34.4元；揸住五成股權的廖創興企業（00194）跌13.9%，收17.1元，拖累埋大新銀行集團（02356）及大新金融（00440）雙雙重挫。

如果睇業績，今次每股35.69元的出價，相當於往績市盈率28.5倍，已經唔算低，尤其交易之中，廖企以22.3億買番中環總行（創銀股東因而收到4.5195元的特別息），再以每年約6,792萬租番畀創興，租金等於去年整體盈利5.43億的12.5%，減番原有數百萬的折舊開支，考慮營運成本上漲，實際出手唔算低，小股東應當成人之美，賣給新大股東或直接在市場沽掉，因收購要約一過，相信企在2倍市帳率樓上的機會微乎其微。

反而廖企小股東就要揣測大股東心意，減持廖銀後未來業績難免會急跌，但套現、回購大樓等連串交易，估計每股價值將升至34元左右，現價折讓五成，如果以特別息將套現派出的話，有機會令折讓收窄，但也不能排除像國浩（00053）賣掉道亨之後，保留現金作其他發展的例子，國浩之後持續有四至五成折讓，值得廖企小股東們參考。