愈來愈多內地旅客嚟香港玩，同旅遊業相關嘅找換店，同埋旅行社都密手擴充。代理話，過去三個月找換店承租尖沙咀同旺角舖位嘅數量升幅最勁。其中尖沙咀彌敦道有個地舖，早排就畀找換店以每月11萬元租用，新租金升咗三成；另亦有旅行社以超過14萬元，頂租中環德輔道中一個地舖。

近月旺角西洋菜南街找換店數目明顯增加。

近月找換店及旅行社搶租地舖個案

近年人民幣狂升值，再加埋內地嘅《新旅遊法》，內地旅客自然多咗嚟香港消費購物同埋報團旅行。有代理同劉Sir講，過去三個月，找換店搶租地舖，租嘅街道唔少係最旺嗰段，包括尖沙咀彌敦道同旺角西洋菜南街等。

新約貴兩成 踢走食肆

聽講彌敦道36至44號地下部分，面積只係50方呎，找換店早排以每月約11萬元租用，呎租約2,200元，呎租貼近附近鐘錶珠寶店租金。

另旺角西洋菜南街雙號有個地舖加閣樓部分，由於近往來落馬洲口岸小巴嘅上落客位置，早排畀找換店睇中，踢走食店，以每月6.5萬元租用，呎租160元，較舊租高出兩成。

有間本地旅行社都密密手搶租舖位；啱啱就頂租德輔道中雙號地舖，月租超過14萬元，同前租金一樣，面積約700方呎，呎租約200元，前租客係賣皮革手袋等貨品，租用上址只約半年，早前決定放頂租。

元朗巨舖回報3.3厘

近年成為內地旅客新血拼地區嘅元朗，地舖租盤愈來愈搶手。中原曾自強話，聖安娜餅屋約十年前購入自用嘅元朗大馬路112號全幢3層巨舖，依家放租每月達約50萬元，呎租約140元，若成功租出，會係嗰區新指標；而業主租金回報率超過3.3厘。

近月銅鑼灣波斯富街吉舖驟增，地舖業主加租都保守咗。利嘉閣朱子豐話，連鎖錶行時間廊現租用嘅77至83號地下A舖，租期出年第一季到期，業主依家已經嗌定每月新租金約37萬元，呎租610多元，同現租金比加幅近40%。