最近二手樓市好似唔識郁，如荔枝角美孚新邨同鰂魚涌太古城兩大藍籌盤，加埋成2.5萬伙有多，竟然成個星期一粒成交都無。其他屋苑就算有成交，唔係勁平就係勁劈。大圍居屋美城苑低層單位賣咗223萬元，比市價大幅低15%。難怪代理都認為今季樓價跌約莫3至5%，全年樓價都隨時「負增長」。

二手市淡靜，太古城連續一星期未聞成交。（資料圖片）

50指標屋苑樓價按月走勢

劉Sir同代理老友傾開，二手成交真係好靜，香港置業余柏話，美孚新邨已經十日無成交，代理依家都係力谷一手樓。不過佢都話，其實業主都慢慢調整叫價，有「實客」可以傾多2至3%。

美城苑低15%始承接

作為代理真係唔怕樓價跌、最怕無成交，好似月頭頻錄劈價成交嘅太古城，買賣突然死火，老友中原張光耀話，該盤成交個案「想報都報唔到」，對上一宗成交已經係上個星期三。

利嘉閣陳維進都話，藍田麗港城過去兩日都未聞成交，部分「醒水」業主已自動減價約5至8%左右。的確最近成交比較多低價同減價個案。世紀21奇豐張文鏗話，上述美城苑A座低層4室，建築/實用面積471/351方呎，自由市場成交價只223萬元，低市價15%。中原王樹明話，天水圍嘉湖山莊三房最近耐唔耐就出現300萬元以下成交，其中翠湖居6座高層C室三房，剛減價22萬元，以298萬元售出。

今季樓價睇跌半成

居屋市場掀減風，家天下表示，旺角富榮花園15座中層E室減19萬，以311萬元免補價成交。中原周世康話，香港仔漁暉苑F座中層6室減30.2萬元，於自由市場339.8萬元售出。

利嘉閣周滿傑話，50個指標屋苑上月加權平均成交呎價約7,767元，按月回落0.3%。佢估計今季新盤魚貫登場，二手樓價會有壓力，今季或有3至5%跌幅，將「嘔凸」首三季累積約2.9%升幅，出現負增長。

另美聯劉嘉輝話，加強版額外印花稅即將屆滿一年，由去年十一月起，至截至本月二十二日，住宅摸貨登記僅22宗，按年大跌約64%。