近期港股無將美國債務危機放在眼內，昨日美國財政僵局解決，反而出現反高潮，直插到尾，反映市場預視昨晚美股好可能有類似反應。

恆指期貨走勢 2013/10/17

藉美股隔晚高收之勢，港股昨日高開123點，報23,351點，現貨隨即見全日高位23,357點，之後逐漸失去支持，午後A股由升轉跌，加上尾市淡友相當積極壓制，結果恒指要倒跌133點，收報23,094點，期指日市收22,961點，較現貨低水133點，成交5萬張。客觀睇，恒指連續五日陰燭，在在顯示橫行多時後動力正在減弱，唔少三四線股炒到癲，市況焦點已從一二線股轉到莊家股，加埋自九月十三日開始，大市沽空佔成交比例持續在單位數，大戶挾空倉的誘因亦告減低。

種種迹象，加埋期指尾市先後跌破23,080點及23,055點，筆者忍唔住先以三分一注開淡倉。暫時先以22,684點為目標，守得住，上落市或者仲會持續一陣，反之，跌穿可視為高位派發完成，暫訂以收市高於23,160點作為止蝕。