屯門同沙頭角兩幅限量地尋日開標，劉Sir睇見屯門地成交價即場嚇親，呢幅地由香港興業（00480）以5.51億元投得，以純住宅計每方呎樓面地價高達約4,668元，較市場估計高出最少千幾銀。測量師老友估計落成實用呎價要1.1萬元，呎價拍得住西鐵屯門站上蓋瓏門。沙頭角地就由遠東發展（00035）以1.43億元奪得。

屯門湖安街限量地由香港興業投得，項目住宅及商業樓面比例仍有待該財團釐定。（資料圖片）

香港興業董事總經理 查懋成

兩幅限量住宅地中標結果

地政總署尋晚公布，屯門湖安街與湖康街交界、及沙頭角順隆街與順昌街交界兩幅限量地，以5.51億元同埋1.43億元最高標價批出，中標財團分別係香港興業同遠展。

高緯：個盤「幾難賺」

香港興業擊敗其餘9家財團以5.51億元投得屯門地，劉Sir收到消息後當場嚇親，事關屯門限量地估值都係講緊4億唔使，雖然呢幅土地樓面計算方法比較複雜，但橫計掂計都係一個字─貴。

老友高緯環球張翹楚話，呢幅地售價遠超預期，香港興業附近又無乜地盤，而由於有限量條款，為免每個單位面積太細，扣除約3,854方呎做老人日間護理中心，正路嚟講都應該用盡其餘約11.8萬方呎住宅樓面，咁計地皮樓面呎價約4,668元，估計落成後實用呎價要1.1萬元，佢覺得個項目都「幾難賺」。

劉Sir雖然無呢位老友咁專業，不過單睇上述落成後呎價料約1.1萬元，又真係拍得住西鐵屯門站上蓋瓏門嘅呎價。

遠展投得沙頭角地

另一方面，上周收到5份標書的沙頭角限量地，就由遠展以1.43億元奪得，樓面呎價約莫1,104元，屬於市場估算範圍以內。

集團高級營業及市務總監方俊話，會跟番地契提供最少240個單位，初步構思興建6幢分層住宅，單位面積約500至600方呎，料投資額大概5.5億元。佢仲話呢幅土地有靚海景，可滿足市場對中小型單位嘅需求。