前晚，奧巴馬正式提名耶倫接替伯南克，成為聯儲局史上第一個chairwoman，就只等參議院確認。消息一出，美股由早段一度跌穿200日線14,728點後回穩，升26點，報14,802點；跌穿80的美匯指數止跌回升、商品價格尤其金油價偏軟。點都好，不明朗因素先除其一，短期大市焦點返到本月十七號的國債觸頂危機，以及美國企業第三季業績期揭開序幕身上。

太陽日誌2013/10/11

大行預測深圳國際業績（港元）

下周一假期關係，距離十七號死線，港股比外圍少一個投注日，因為咁，尋日睇好睇淡的投資者，有趨勢更主動測試對方底線，恒指升過50點，亦跌過290點，收市跌82點，報22,951點。過去一個月恒指兩個低位延伸出的頸線22,883點一度失守，恒指波幅指數自上月在14.76點見底，輾轉去到尋日即市高位19.2，創超過一個月新高，基金大戶及衍生工具莊家，似乎已為不日登場的單邊市做好準備。

高檔消費陷入寒冬

黃金周同胞來港消費唔及預期，卓悅（00653）港澳地區零售額只有6%增長，股價跌8.4%，拖累埋莎莎（00178）跌5.8%，周生生（00116）及周大福（01929）雙雙跌2.7%。中央新領導人上場主打反貪腐，茅台之後，法國波爾多五大酒莊之一、同胞至愛的拉菲，新一期酒花都有盛極而衰之感，據知今年連大閘蟹銷情都受衝擊，報道話小南國（03666）內地分店半打大閘蟹套餐298元人仔，足足平去年一半，主攻中高檔消費的內需股，看來未有耐度過寒冬。

投資市場向來貪新忘舊，似乎大家已經唔記得，上海自貿區前炒過一排前海概念。記得月初，外電引述一位熟悉中國太平（00966）及中石化（00386）合資計劃的人士話，上海自貿區比前海吸引，主要係金融界都認定，上海自貿區長遠比前海更加得到國家領導人眷顧！筆者無買過前海概念股，但都覺得前海概念的捧場客，有被賣豬仔的味道。

睇番深國（00152）及中集集團（02039），年初炒完一浸之後，股價牛皮大半年，唯獨招商局國際（00144）多得波羅的海指數反彈，相對上比較堅挺。近排個市偏靜，分析員搵題目要加入一定的幻想，最近見盤口賭緊明年邊度會係第二個自貿區，當中，廣東自貿區熱門名單包括前海、橫琴同南沙，而直接受惠的香港上市股份，包括廣船（00317）、深控（00604）、廣深鐵（00525）及招商局等幾隻。但筆者認為短期自貿區純粹係畀地方政府搞熱地產、賣多幾塊地皮的藉口。睇見前海概念一剎那光輝，股民追逐第二個自貿區概念時，值得加以借鑑。