近排拍賣場氣氛認真麻麻，不過自從有西九新盤劈價，唔少業主態度都軟化咗，肯面對現實低價賣樓。尋日中國銀行廣東開平支行前行長許超凡等被法院下令出售抵債嘅藍田滙景花園3伙，之前都拍過好多次，今次終於全部賣晒，仲係比銀行估價低8至16%，拍賣行負責人話，業主減價方向明確咗，普遍拍賣底價都肯減一成，所以拍賣場罕有重現熱烈氣氛。

藍田滙景花園有三個單位，透過拍賣行推拍，昨日有逾六十人到場，氣氛熱鬧。

拍賣場低價成交個案

上述嗰3伙滙景花園，今年已經透過忠誠拍賣行第三度推拍，開拍價更加一減再減，累減幅度達一成，唔少業界朋友都話好吸引。劉Sir尋日亦有到場觀摩，現場有超過60人出席，好耐無見過咁熱鬧。

拍賣底價減幅普遍一成

率先開拍係12座低層B室，建築/實用面積約785/612方呎，即時吸引5至6組客出價競投超過20口，單位終以546萬元賣咗，比開價486萬元高出12.3%，建築/實用呎價約6,955/8,922元。

另外同座中低層G室，建築/實用面積約913/718方呎，開價603萬元，亦吸引多組客爭奪至660萬沽出，建築/實用呎價約7,229/9,192元，較個別網上銀行估價790萬元，低出16.5%。至於項目17座低層B室，由於景觀麻麻，僅被搶高4.3%以507萬元賣出，但都比較估價低一成半。

忠誠拍賣鄭世傑同劉Sir講，估計出價嘅主要係用家，畢竟市場成交靜咗咁耐，已經累積一批有需要嘅用家，而3個單位成交價雖然低過市價，但已比法院定嘅底價高近一成。佢仲話，西九新盤劈價，唔少業主睇淡後市，拍賣物業嘅底價都普遍有一成減幅，呢場拍賣係本月為止成績最好嘅一場。

兆麟苑競投激烈售262萬

另一方面，同場亦賣咗屯門兆麟苑B座中層9室，開價238萬元，雖然無樓契正本，仍有多口承價至262萬元賣出，建築/實用呎價約3,690/4,729元，較個別銀行估價低近一成八。