辣招嚴重打擊物業市場，多間私人拍賣行亦大受影響。市場主要私人拍賣行喺第三季平均只係有約莫20幾宗成交，比第二季仲要少近三成，拍賣行生意額普遍按年下跌50%，成交集中500萬以下細價樓。有拍賣行直言，今年係佢哋歷來拍賣生意最差嘅一年，尤其第三季，預期直到明年底都唔會有好轉。

辣招嚴重打擊物業市場，不單住宅交投淡靜，多間私人拍賣行亦大受影響。（資料圖片）

近期私人拍賣會售出500萬元以下物業

多場拍賣會零成交

市場唔少私人拍賣行，一般每周舉辦兩至三場拍賣會，一個月有達十場或以上，涉及拍賣物業數量上百間。不過二手市場大吹淡風，生意難撈，劉Sir同幾間拍賣行老友傾開，佢哋都話未見過市場咁冷清。

環亞拍賣行曾傑俊話，唔單止住宅「無運行」，連工商舖物業亦被打壓，單係第三季佢地嘅生意額就按年勁跌50%，好多場拍賣會都零成交，比○三年沙士時惡劣得多。

佢話，「沙士期間一個月約六場拍賣會，推出百幾二百項物業，一個月成交都達60至70宗，主要係當年好多業主、銀主盤都肯平賣，減咗兩成仲有得傾，依家唔止無晒炒家，連投資者都極少，唔少熟客寧願收租唔平賣。」佢話惡劣情況可能會延至明年底。

另外，亦有拍賣行話，印花稅大大加重投資成本，加上非住宅物業亦成為打壓對象，市場可以話係由用家支撐，現時每月拍賣沽出的物業勁跌70%，而去年佢哋平均每月售出15至16個物業。事實上，據劉Sir粗略估算，市場主要四間私人拍賣行，喺第三季只係售出20幾個物業，比第二季錄得嘅30幾宗，低出近三成。

代理行望政府減辣

此外，礙於印花稅大增，拍賣成交的物業主要由500萬元以下細價樓支撐，資料顯示，季內只錄得一名買家連環購得凱旋門兩伙銀主單位，涉資額逾2,400萬元，已屬最大額成交。有拍賣行話，同兩年前幾乎每個月都有逾千萬元成交，差距甚遠。

另一方面，辣招苦主大聯盟亦都準備發起第四次行動，召集人朱姐（朱建蘭）話，計劃今個月內再有三日停賣地產廣告，而運輸業界亦都會發起大遊行，希望政府能為辣招減辣。