Fundman睇市：乳品股 升浪未見頂

今年美國聯儲局尚有兩次議息，分別是十月二十九至三十日，及十二月十七至十八日，會唔會提出減少買債開始退市第一步？在下估機會仲係低於五成。五月中開始，自伯老提出退市言論，美國按揭息率跟隨債息回升，近月樓市銷售數據開始見放緩，就業市場不過不失，今年美國通脹維持1至2%之間，顯示三次QE對拉動通脹的直接關係並不明顯，加埋九月聯儲局調低今、明兩年經濟增長預測至2.15%及3%，伯南克又做埋一月講拜拜，無理由開完退市第一槍，就由下任主席執手尾，萬一今年第四季同明年首季美國經濟又再轉弱，將對聯儲局公信力構成沉重打擊。

匯商唔信會退市

另一邊廂，日前美匯指數終於跌穿80的心理關口，番到二月初水平，由七月高位84.75計，美匯兌一籃子貨幣累積貶值5.7%，一路驚退市美元一路跌，似乎匯商認定聯儲局最後得個講字，簇新的美鈔仍會源源不絕，繼續供應。

美國財政懸崖搞到政府部門拉閘，但港股一於好少理，連挾兩日，尋日再升229點，報23,214點，兩日加埋升355點，番到上星期五收市點數之上，可惜成交得536億，仲要加埋超購王雲遊（00484）及半新股輝山（06863）近41億成交先有五字頭。

未知是否因為一孩政策有聲氣逐步放寬，今年內地原乳價格漲唔停，年初至今累積升6%，按年更大升13%，一眾乳業相關股份統統爆發，潛水艇輝山強勢重返水面，一升就10.3%，報2.78元，計落預期市盈率18至19倍，比蒙牛（02319）平，加埋一條龍由養草、養乳牛到生產乳製品，記得上市前睇過大行分析話其原乳每升價1%，其收入會有等值增幅，加埋上市後低位收乾，炒佢合情合理。

主攻上游的現代牧業（01117）亦肯定受惠，一四年20.9倍PE，在一眾天價的乳業股中，應有水位。至於在中糧入股後變半隻國企的蒙牛，單係睇中央扶持乳業消息前，已部署入股現代牧業，再買埋嬰兒奶粉股雅士利（01230），盡顯早着先鞭。五月22元樓下起步，完美直線升浪，想等位入真係難比登天，一三年32倍PE，惟有抱貴買貴賣心態。

雅士利公眾持股量不足拉閘個半月，期間合生元（01112）累積升四成九，揸住的股東等派彩也！最睇唔透係合生元，主攻高檔嬰兒奶粉代理，唔計反壟斷被罰，估計今年賺9.9億人仔，32.5倍PE，尋日創64.5元上市新高，短期升勢唔似會停，但要60元樓上衝入去，史提芬就情願短炒現代牧業同輝山。