本港舖位租金勁貴，唔少老字號商戶都捱唔住要關門大吉，業主企硬加租，寧願丟空等貴客。近年狂開分店嘅爭鮮迴轉壽司，首度喺佐敦插旗，租咗佐敦金百龍大廈1樓全層，個單位原本係由北京酒樓租用超過四十載，吉咗差唔多十個月，終於租出咗；有代理估計，個舖新租金每月約15萬元，較之前高出約五成，以依間壽司店每碟賣價計，每日要賣超過600碟，先夠俾租。

佐敦北京酒樓舊址舖位丟空近十個月後，現以每方呎近40元租出。（資料圖片）

銅鑼灣勿地臣街一帶的商舖租金硬淨。（資料圖片）

原由老字號商戶租用的舖位陸續租出

有代理同劉Sir講，自從舊年周大福以每月約180萬元搶租佐敦道與彌敦道交界單邊巨舖後，反映該段街零售後市變天。上述彌敦道227號1樓面積約4,000方呎，原由北京酒樓租用超過四十年，月租金估計約10萬元，聽講業主舊年加租，租客最終同年年底結業唔做，當時上址市值租金差唔多15萬左右，可能業主揀客，所以遲遲都租唔出，啱啱獲悉間舖由上述日式壽司租咗，估計月租約15萬元，呎租約近40元，同舊年市場估值相若。

麵包舖長吉願短租

事實上，唔少老店遷出後嘅舖位，吉咗一段長時間，近排都開始有客承租，其中，銅鑼灣勿地臣街有個原由老牌麵包舖十幾年買入自用地舖，舊年交吉售出後，吉咗約一年，早排以彈性租約形式租出。有銀行睇好佐敦區零售後市，租用咗近二十年嘅彌敦道地舖，早前續租，新租金每月約85萬元，呎租超過280元。

力寶呎租創三年低

港島甲級商廈租金愈來愈低，金鐘力寶中心錄到呎租跌穿破40元。美聯商業趙詩敏話，該廈1座10樓03室啱啱以每月約7.5萬元租出，以面積約1,929方呎計，只得39元。聽講呎租係三年新低，而該廈上個月中才有極低層戶以呎租40元租出，依家上址新低租金仲嚇人。

中環商廈全層放售，業主企硬開價，高力資料顯示，區內荊威廣場8樓全層連約放售，意向價7,473萬元。