進入互聯網嘅年代，雲端運算服務需求龐大，港府今年中揀咗將軍澳環保大道一幅約11萬方呎地皮，作為第一幅高端數據中心用地出售，鼓勵機構嚟香港發展，塊地今個禮拜五截標，高緯環球香港董事總經理蕭亮輝（John）認為，數據中心需求「只會有增無減」，估計今次除咗本地財團入標外，亦會吸引內地同埋亞洲地區嘅「過江龍」爭埋一份。有市場人士計過數，塊地成交價約5.7億至7.1億元左右。

政府首次公開招標出售位於將軍澳的高端數據中心用地。（資料圖片）

高緯蕭亮輝料數據中心需求有增無減。（資料圖片）

將軍澳工業邨部分全幢數據中心

阿John同劉Sir講，前幾年，Google（谷歌）、滙豐銀行（00005）、中國移動（00941）同埋港交所（00388）等公司，都喺將軍澳工業邨發展高端數據中心。由於數據中心要有勁大量同穩定電力供應，唔少供應商都兩手準備，喺另一區搵地設立該類中心，藉以減低集中一區嘅風險，所以政府應考慮喺柴灣之類嘅工業成熟地區，研究新選址。

租金貴工廈貨倉五成

數據中心咁吃香，租金自然可觀，通常比工廈同貨倉高約莫五成，依家私人市場供應都唔少，主要分布喺柴灣、葵涌、荃灣及沙田一帶，其中，投資開舖同起酒店等嘅大鴻輝興業，喺荃灣工業中心2至5樓共4層，面積加埋約4萬方呎，都會用作數據中心出租。

睇番資料，原來政府已留咗將軍澳兩公頃地用嚟發展數據中心，其中上述將軍澳市地段第122號高端數據中心地皮，喺環保大道第85區，地皮面積約11萬方呎，最多可起約47.36萬方呎樓面。幅地估值各有不同，有啲測量師估計呎價1,500元，涉資約7.1億元。

鼓勵發展 底價料相宜

不過，有業界人士就咁睇，政府今次推出數據中心地皮，係想鼓勵有關發展，相信要求底價亦較相宜。

為推動數據中心建設，政府舊年推行兩項措施援助數據中心嘅發展，包括將合資格工業大廈部分樓層更改為數據中心用途，可獲豁免豁免書費用等。政府資訊科技總監賴錫璋講過，收到6份申請，半數已獲批。