在「十．一」長假期前夕，A股好似食咗瀉藥咁，滬綜指昨跌42點，報2,155點，返回近兩個半星期低位。港股在九月期指結算前夕，跌84點，報23,125點。股市就係咁得意，九月初港股由21,500點樓下開始挾倉潮，睇淡的熊仔客一路被屠殺，到上星期，個個以為殺得性起的期指大戶，會挾到淡友爆倉，企穩高位結算，結果牛熊證玩家由唔信會升，變成唔信跌，22,800至23,000點的牛證街貨大增，昨去到相當於約2,000張期指對沖值，間接提供誘因畀大戶掉轉槍頭炒落。

太陽日誌2013/9/27

綜合大行預測碧桂園業績（人民幣）

阿里巴巴集團終止同港交所（00388）磋商在港上市，即使港股今年失落集資王美譽機會好大，但見本地及海外媒體，大都為港交所及證監會今趟有腰骨、有膊頭的決定讚好。查實阿里巴巴一二年先私有化，捧場客半推半就以每股13.5元投降，年多後，眼見今日做完一輪財務工程整合一堆系內資產再以千億美元估值上市，有幸災樂禍心態，亦係人之常情也。

輝山暗盤反高潮

雲遊控股（00484）錄得超額認購312倍，榮登今年凍資王，今日輝山乳業（06863）掛牌，公開招股部分超購11.7倍，按規定回撥15%，細飛客人人有份，結果傍晚暗盤得2.6元，認真反高潮。史提芬也為跌眼鏡向看官們「沙冧」。到底係細飛分得散？定價過分進取（2.28至2.67元的上限）？抑或口痕友話齋，彤叔系新股通常開波無力？今日自有分曉。

碧桂園（02007）八月份合約銷售金額，單月突破百億元（人民幣．下同）大關，至119億元，按月升86%，首八個月累計銷售達519億元，相當於公司全年銷售目標620億元的84%。不過，展望餘下四個月，推盤項目規模不及八月。近日見唔少分析報告，雖然都估佢全年達標唔難，但應該唔會相差太多。

早兩日公司發債，本金7.5億美元，指標息率7.25厘，二一年到期。由於今年售樓現金回籠唔細，據知反應唔錯，尤其聯儲局話唔退市後，部分早前跌幅唔細的公司債，都見好息之徒有重投懷抱趨勢。

近半個月，內地頻頻有新地王誕生，見唔少大孖沙開始憂慮會逼中央出手，在「新國五條」上加辣配合調控，且第三季結前拆息抽高，部分地方有暫停按揭審批的消息，內房股升勢確實有立立地迹象。碧桂園由六月低位3.51元（港元．下同），升至早兩星期高位5.28元，累升達五成之多。撇除沽股換債的可能性，不妨睇番過去兩年，碧桂園估值在5.8至9倍之間上落，現時一三年PE8.5倍，屬偏高位一方，早前有入貨的，或可考慮減減磅，等下一次機會。