嚟緊政府將會公布新季度賣地計劃，應該無乜驚喜，政府都要不斷諗計增住宅供應。剛就提出將大嶼山梅窩銀灣邨以西合共近26.3萬方呎地皮轉為住宅發展用途，市場估計提供到1,800個單位，不過個計劃首部分會先起500伙居屋。另一部分就長遠啲，搞掂基建等先做得，咁即係又要等。其實政府都知唔夠數，頻加大賣地表內地皮嘅發展密度，但都只係唔夠一千伙，可以話係達標無望。

政府諗計增住宅供應，房署等近日提出修訂梅窩邊緣分區計劃大綱核准圖。（資料圖片）

梅窩銀礦灣路地皮建議在中長期內作住宅發展用途。

中長期及短期增加住宅供應情況

房屋署等提出修訂梅窩邊緣分區計劃大綱核准圖，將銀灣邨以西，銀鑛灣路西邊盡頭一片佔地超過26萬方呎政府社團用地，作住宅發展用途。

部分起居屋料500單位

其中該地皮北部佔地近8.3萬方呎地皮，轉作住宅甲類用地，先起約莫500伙居屋，物業高度約主水平基準以上55米，照計約莫12至16層，預計二○一七至一八年落成。

至於南面佔地近18萬方呎地皮，大部分為棄置農地及魚塘等，部分亦屬私人地皮，加上無道路基建等等，需要時間去深入研究住宅發展可行性，故暫時轉做未決定用途，不過建議發展密度一樣係3.6倍，高度就49米。劉Sir以起每個單位500呎計算，相信可以起到1,300個單位。

睇番政府舊年年底開始已不斷諗計增短期住宅供應，首先一口氣調高4幅將軍澳南限量地嘅地積比率，4幅土地係68B1及B2區，同埋65C1及C2區土地，地積比率調升咗0.3至0.4倍不等，總計單位多咗約433伙，至合共3,320伙。

靠增密度達標有難度

之後地政總署再喺今年上半年，大幅調升沙田九肚區3幅土地密度，個別地盤樓面更大增一倍，以每伙面積1,000方呎計，呢3幅地單位數量亦因而多咗約360伙。

劉Sir屈指一算，單計呢兩個發展區，額外增加嘅單位只有近800伙，只係靠「唧牙膏」方式去增加供應；老友高緯環球張翹楚認為，透過加大發展密度讓供應達標實質上係無可能。