魚缸Blogger：中國旺旺有力再彈

八月份CPI按年上升2.6%，通脹依然溫和，加埋中秋節同新股影子效應，近月零食股回勇，尋日中國旺旺（00151）逆市升逾4%，以全日高位11.76元收市，再次突破六月推介時定的阻力位11.28元，相信仲未彈夠。

旺旺從事製造及分銷食品和飲料，上半年收益增長14.9%至17.54億美元，純利增長33.2%至3.08億美元，原因係「旺旺」品牌及渠道資源優勢，同埋成本及費用管控得宜，其中收入佔比逾五成的乳品及飲料類業務收益增長18.3%，而「旺仔牛奶」收益增長兩成。

隨住大宗原物料價格回落及產品結構優化，期內毛利率亦升4.1個百分點至41.2%。雖然公司喺月初畀統一企業（00220）配售4,626.1萬股份，不過股價依然非常硬淨，100日線11.03元支持唔錯，短線若仲守得住嘅話，可博見五十二周高位12.52元。