尋晚開始,一連兩日聯儲局議息,話就話主張盡快退市的「鷹王」薩默斯退出下屆主席輪選,但聯儲局既要明年中由量化寬鬆中全身而退,即使近期美國就業數據唔算強,伯南克如有心退市,今晚至少都會將每個月850億美元的買債規模,減到750億美元。這個程度的退市,相信股市老早預咗,事實十年期美債孳息現時處2.84厘,比一二年九月聯儲局推QE3時,足足高出近1.3厘,可見債市玩家老早已當QE3無咗。

太陽日誌2013/9/18

永亨中期業績(港元)

其實,更加要小心嘅反而係十月底,美國國債預期會觸及16.7萬億美元上限,如果國會唔隻眼開隻眼閉,又再臨時審批提高上限,美國政府舉債危機,隨時影響環球股市債市。周身債,解決方法來來去去都係開源(加稅)或者節流(削減公共開支),兩者都難免令經濟復甦減慢,近幾個月,美債息顯著回升,長遠也帶來更龐大國債利息支出,美國能否完全退出量化寬鬆計劃,筆者甚有懷疑。

按目前趨勢,最有利係維持低匯價政策,加埋超低息配合,近日一眾外幣兌美元齊齊轉強,同美國經濟比歐亞更早見底,聯儲局最先退市的預期背馳,似乎匯商已經開始為十月國債上限問題,做好部署。

近日聽到唔少人預期美國退市加埋政府辣招,樓價兩年要跌五成。親身見證兩次樓災,印象中,樓市同股市最大共通點,往往係通街睇淡時愈難會暴瀉。查實磚頭價格急升,近年並非香港特產,但香港奇怪之處,在於鍾意為樓市升浪設定一個奸角,曾經有人認為高樓價問題源於炒家,政府於是針對性地推SSD及BSD措施,限制投機買賣,結果樓價唔跌;跟住又有人話,內地豪客是推高樓價的元兇,雙倍印花稅DSD因而應運而生,但即使辣上加辣,樓價亦只係升勢減慢,講到底問題在於供應不足,以及回歸後多了有條件來港定居及投資的內地人。宏觀環境,美國量寬令便宜錢通街都係,如果筆者估計無錯,全球大債仔美國短期內都好難改到以債養債的惡習,甚至加埋匯價貶值及超低息三合一,全球資產泡沫只會愈吹愈脹,難以收拾,除非特區政府夠膽調整7.8這個數字,則另作別論。

本地銀行忽然搶手

本地銀行股因為永亨(00302)可能賣盤而急升,加埋早前創興(01111)表示遭買家洽購,估唔到突然間,咁多買家對香港一紙銀行牌照動心,街外仲傳到話會見到2.4至2.9倍市帳率,以香港銀行業高度競爭及瘋狂的出價,話潛在買家唔係阿爺的公司,用嘅唔係國家錢,真係講都無人信。

尋日提過隻零食股天喔(01219),基金配售部分僧多粥少,首日掛牌果然似模似樣,收報3.67元,比招股價炒高16.5%。今次天喔上市共發行5億股新股,其中2.27億未上市先被基礎股東認頭,尋日3.18億股易手,估計街貨已經收得好乾,雖然長揸信心一般,但短期睇落似乎仲有相當水位可以炒上。