聯儲局會議前夕，缸邊友一於唔做唔錯，尋日大市交投偏靜，炒家轉攻新股認購，尋日掛牌的天喔（01219）表現理想，聽聞國際家居（01373）公開認購部分超購百倍，另輝山乳業（06863）國際配售部分已提早截飛，故見尋日多隻半新股起步，如佳明集團（01271）及英達科技（06888），短炒不妨多循呢個方向搵目標。

夥拍雷諾開發電動車的計劃遲遲未有進展，成為東風股價近日跑輸大市的主因。（資料圖片）

尋日魚缸另一焦點乃永亨銀行（00302）證實獲洽購的消息，刺激永亨股價急升近四成收市，其他中小型股亦備受追捧，大眾金融（00626）升6%、大新金融（00440）及大新銀行（02356）亦分別升9%及17%。市傳中資保險企業乃永亨買家，老實講出得起傳聞中2.5倍市帳率作價買香港中小型銀行的買家唔多，出手咁闊綽，係中資企業的機會亦唔細，相信呢次中小型銀行併購潮炒風冇咁快完。

長假當前影響氣氛

事實上，唔單只港股交投轉靜，A股成交亦備受節日氣氛影響，事關周四、五內地中秋節假期休市，即係話Trade埋今日就進入長假期，如無意外今日港股成交亦會較靜，選擇個股短炒首重人氣，以免上車容易落車難。

講咗好耐的新能源汽車補貼方案終於出台，工信部下發通知，一三至一五年繼續開展新能源汽車推廣補貼工作，龍頭股比亞迪（01211）股價逆市靠穩，收報35元，升0.7%；其他汽車股如長汽（02333）、吉汽（00175）及東風（00489）亦輕微高收，最靚係華晨（01114），升4.8%，反而新晨動力（01148）就後勁不繼，倒跌3.6%收市，報3.42元。

講開東風，六月份阿莊都講過睇好其與雷諾（Renault）組合營拓展電動車市場，雙方擬於武漢設立合資廠房，項目投資額達12億美元，料建設須時兩年多，成事應該係愈快愈好，但到依家似乎仍未聽聞雙方簽正式合作協議，係咩問題不得而知，但在合作項目明朗化前，股價表現難免受到限制，難怪近一個多月指數同中資股普遍累積一定升幅，東風表現卻相對落後。

阿莊相信，依家風水輪流轉，中企在與外資談判合作條款時會企得幾硬，但其實「拖」對大家都冇好處，相信無論如何，年底前點都會有進展。上次阿莊都建議唔好高追東風，依家建議做定兩手準備，一係就等回吐先好諗分注收集，一係就等佢有好消息刺激，以大成交突破11.5元阻力位始入場追貨，主要阻力仍在13元關。