近排樓市雖然比較靜,不過有重磅投資者早着先機,趁價高大批放售物業伺機換貨。劉Sir知道,有單一組投資者連環放售約24項物業,叫價加埋近7.8億元,以尖沙咀廣利樓地舖連1、2樓叫價1.25億元最貴。亦有老牌投資者標售市區舊樓業權,該物業為何文田自由道9至11號及13號,標售業權逾85%及95%,意向價高達6.4億元。

尖沙咀山林道地舖連樓上部分單位,意向價共約1.25億元。

推出標售的何文田自由道舊樓,佔地共約7,146方呎。

市場資深投資者放售的部分物業

山林道一籃子叫億二

世邦魏理仕鍾德堯話,最近有資深投資者委託佢哋獨家放售3項物業,包括尖沙咀山林道29至31號廣利樓地下4A及4B地舖、1樓及2樓零售及住宅樓面,意向價1.25億元。

另外兩項分別係彌敦道724至726號商廈頂層連外牆廣告,叫價7,000萬元,佢仲話廣告牌可分拆賣;而北角城市花園商場7至14座地下14至19及22號舖,叫價約莫3,600萬元。

劉Sir即時聯想,會唔會係日前放售包括尖沙咀名鑄相連戶共4項物業嘅同一業主呢?呢位老友承認,該組投資者委託佢哋放售7項物業,目的在於優化投資組合,仲話佢其實揸住唔止咁少物業,畀咗個網址劉Sir睇。

呢個網頁原來係其持貨同放售單位嘅菜單,入面有約39項以商舖為主嘅物業,當中約24項附標價放售,總叫價接近7.8億元。除咗上述廣利樓地舖等叫價1.25億元最大額外,旺角上海街375至380號地下5至7號舖及1、2樓亦標價1.25億元。呢批物業由公司持有,據公司註冊處資料,公司董事包括鄭錫強等,照睇同新世界發展(00017)創辦人鄭裕彤嘅姪兒同名。

何文田舊樓6.4億標售

亦有投資者標售具升值潛力嘅市區舊樓業權,第一太平戴維斯馮偉全話,上述何文田自由道9至11號及13號,樓齡四十九及五十年,標售業權逾85%及95%,截標十月三十一日截標,中標者可以申請強拍統一業權,重建後樓面有約64,341方呎。

佢又話業主所持業權,項目意向價約莫5.8億至6.4億元。