近幾個月少咗鐘錶珠寶店同外國時裝品牌搶租一線街舖，核心消費區吉舖多番。以銅鑼灣波斯富街為例，市況突然轉淡，舖位業主叫租依然強硬，部分租金加幅企硬喺超過兩倍，結果條街有成5個吉舖，情況極之罕見。有區內代理話，先施百貨下季開業，加上利舞臺完成翻新，吉舖情況可望扭轉。

目前波斯富街招租吉舖有約5個，有興趣承租的商戶包括手機店等。

代理指大型百貨公司快將開業，有助帶動人流。

銅鑼灣波斯富街部分放租舖位資料

平均呎租破六百元

美聯旺舖有個老友同劉Sir講，近幾個月零售核心區舖位租金勁吹淡風，但波斯富街地舖業主叫租好硬淨，唔肯減租，條街有5個吉舖，其中有個單號地舖連閣樓，之前由專賣手袋及配飾等物品店舖租用，租約今年中到期，依家以每月約70萬元放租，較前月租約22萬元，加租逾2.1倍。

銅鑼灣羅素街店舖呎租貴絕全球，隔籬街嘅波斯富街當然受惠，舊年中起租金升幅以倍數計，小本經營店舖不敵加租已陸續遷出，依家條街有約莫50間舖，經營麵店同小食等店舖數目得6間，反而連鎖鐘錶店同時尚首飾店數目就多近30間，帶動條街平均呎租升到600多元。

成日去銅鑼灣行街嘅陳先生話，「羅素街地舖租金全世界最貴，唔多唔少帶挈到波斯富街，大幅加租都好正常。」

雙號舖漲租近八成

租約就到期嘅波斯富街地舖業主，對後市充滿信心，淡市下照樣加租，加幅最少七成半。聽講條街兩間現由食店租用嘅店舖，租期將喺下季同明年初到期，業主已經開始將舖位預租，其中有個雙號地舖意向新月租約75萬元，呎租近800元，比依家租金高出近八成。

代理又話，先施百貨月前落實承租波斯富街108至120號地下入口及1、2樓，加埋利舞臺翻新後，將會帶動更多人流，對波斯富街嘅地舖租賃成交量同租金，都會有刺激嘅作用。