前晚道指升135點，收報15,326點，港股逼近五月高位，明顯好友挾淡倉的動力也相對減低，大市一連三日在23,000點關口浮沉，恒指尋日升16點，報22,953點，大市成交回落到629億元，若非騰訊（00700）強勢突破400元大關，帶挈恒指有37點進帳，尋日港股好可能微跌收場。

太陽日誌

蘋果的iPhone5C定價趕客，繼續被大戶糟質，前晚股價再插26.93美元或者5.4%，收467.71美元。瑞銀指iPhone5C定價遠高於預期，未必能夠在中低價智能手機市場佔一席位，將蘋果目標價由560美元降至520美元，相關股份富智康（02038）亦由買入唱淡到沽售，目標睇4.3元；瑞聲（02018）亦畀沽售評級。美銀林美估iPhone5C需求未必及上預期，將瑞聲目標價由50元降至45元，但維持買入評級。

電力股毋須太悲觀

尋日先話電力股可望多兩眼，好衰唔衰撞正內地傳媒報道，國家發改委正審核全國火電上網電價，似是調低電價先兆，幾隻電力股跌幅介乎0.4%至2.5%。缸邊估計減電價最快九月底拍板，傳會按唔同省市，每度上網電價減幅介乎1至3分人民幣，幅度其實在大行分析員預期之內。綜觀電力股低於歷史平均市盈率一大截，筆者相信相關因素已反映，尋日調整係前日急升後的合理回吐，擔心的話，等到月底確實清楚減幅，至入市亦未嘗不可。

尋日國務院提出《大氣污染防治行動計劃》，準備二○一七年前，使1.75萬億人民幣，要全國地級和以上城市的PM10（可吸入顆粒物濃度）比去年減少一半以上。估計大環境有助水電、太陽能及核電等新能源企業，而對主攻小排放及環保汽車的公司亦係好消息，但隻比亞迪（01211）已偷步炒了幾日，尋日高位似有升唔起姿態。

騰訊升勢難言見頂

今次中央仲提到，要二○一七年前將煤炭佔能源消費總量比例，由現時的七成降至六成半以下，睇環渤海動力煤、秦皇島及澳洲進口煤價，近排未改級級落形態，加埋今次國策講明為減低污染會用少啲，睇怕博煤價見底，七月至今累積反彈幅度唔細的煤炭股，可以鳴金收兵了。

港交所（00388）主席周松崗話，希望阿里巴巴能夠來港掛牌，不過也需要保障投資者的利益，言之下意，掌舵人馬雲要求以小股掌大權的合夥人模式，睇怕會有多少阻礙，賓架界預測，阿里未必趕到一三年底上市。以為騰訊今浪純炒阿里巴巴上市的影子概念，但近幾日股價不但不為所動，兼且如入無人之境，反映兩者並無必然關係。事實睇番facebook自從開始加入廣告後，交出了一季好業績，前晚在美國股價都創上市新高，講緊一三年63倍PE。而美國上市內地網股中，搜尋網站奇虎360（QIHU）一年升274%，你話騰訊一年升65%仲有無水位？呢個問題好難用常理解釋，皆因無人知道36倍PE的公司，三幾個月之後，會唔會變成46甚至56倍！